ناکافی بارش سے سنگین صورتحال، شرد پوار کا وزیر اعلیٰ کو خط، فوری اقدامات کا مطالبہ

ممبئی، 18 ستمبر (ہ س)۔ ریاست میں ناکافی بارش کے باعث پیدا ہونے والی سنگین صورتحال کے پیش نظر نیشنلسٹ کانگریس پارٹی شرد پوار گروپ کے صدر شرد پوار نے وزیر اعلیٰ دیویندر فڑنویس کو خط لکھ کر فوری طور پر ضروری اقدامات کرنے کا مطالبہ کیا ہے۔ ریاست کے کئی علاقوں میں بارش کی کمی کے باعث سویابین، کپاس، باجرا، مکئی، تور، مونگ اور اڑد جیسی خریف کی فصلیں سوکھ کر تباہ ہونے کی صورتحال میں ہیں۔ اس کے نتیجے میں کسانوں، زرعی مزدوروں اور مویشیوں کے سامنے بھی شدید بحران پیدا ہوگیا ہے۔ شرد پوار نے اپنے خط میں حکومت کے سامنے مجموعی طور پر 9 اہم مطالبات رکھے ہیں اور موجودہ صورتحال کی سنگینی کو دیکھتے ہوئے فوری فیصلہ لینے کی اپیل کی ہے۔

شرد پوار نے مطالبہ کیا ہے کہ ریاست میں موجود صورتحال کی سنگینی کو دیکھتے ہوئے رسمی معیار مکمل ہونے کا انتظار کیے بغیر فوری طور پر قحط کا اعلان کیا جائے۔ جن تعلقوں میں صورتحال انتہائی سنگین ہے، انہیں فوری طور پر قحط جیسی صورتحال سے متاثرہ قرار دے کر قحط کے دوران دی جانے والی رعایتیں نافذ کی جائیں۔ انہوں نے کسانوں کو فی ہیکٹر کم از کم 50000 روپے کی مالی امداد دینے اور زرعی مزدور خاندانوں کو بھی فی خاندان 25000 روپے کی خصوصی امداد فراہم کرنے کا مطالبہ کیا ہے۔

انہوں نے مالی بحران کا سامنا کرنے والے کسانوں کو راحت دینے کے لیے قرض معافی کی اسکیم فوری طور پر نافذ کرنے اور کسانوں کو بلا تاخیر فصل قرض فراہم کرنے کا مطالبہ بھی کیا ہے۔ باقاعدگی سے قرض واپس کرنے والے کسانوں کے لیے دی جانے والی حوصلہ افزائی کی رقم 50000 روپے سے بڑھا کر 100000 روپے کرنے کی مانگ کی گئی ہے۔ اس کے ساتھ ہی 2025 سے 2026 کے دوران فصل قرض لینے والے اور اس سال قرض کی ادائیگی میں نادہندہ ہونے والے کسانوں کو بھی قرض معافی کی اسکیم میں شامل کرنے کا مطالبہ کیا گیا ہے۔

شرد پوار نے ایک روپے والی فصل بیمہ اسکیم کو ماضی سے نافذ کرنے کا مطالبہ کرتے ہوئے کہا ہے کہ کسانوں کے مفاد میں پہلے خارج کیے گئے تمام متعلقہ معیارات اور سہولتوں کو بھی سابقہ اثر سے نافذ کیا جائے، تاکہ کسانوں کو فصل بیمے کا تحفظ مل سکے۔ اس کے علاوہ گزشتہ سال بے موسم بارش سے ہونے والے نقصان کے لیے اعلان کردہ فی ہیکٹیئر 17000 روپے کی فصل بیمہ امداد بھی فوری طور پر کسانوں میں تقسیم کرنے کا مطالبہ کیا گیا ہے۔

قحط جیسی صورتحال سے متاثرہ تعلقوں میں روزگار ضمانت اسکیم کے تحت خصوصی منصوبے شروع کرنے اور ان کے ذریعے زرعی کام، آبی تحفظ کے کام اور دیگر ضروری کام کرانے کی بھی مانگ کی گئی ہے۔ پھلوں کے باغات کو خشک ہونے سے بچانے کے لیے ٹینکروں کے ذریعے پانی فراہم کرنے کا انتظام شروع کرنے کی تجویز بھی دی گئی ہے۔ جن گاوں میں پینے کے پانی کی قلت پیدا ہوگئی ہے، ان کا فوری سروے کرکے ضرورت کے مطابق سرکاری ٹینکر شروع کرنے اور ان تمام علاقوں میں طلب کے مطابق فوری طور پر چارہ مراکز قائم کرنے کا مطالبہ کیا گیا ہے۔ مویشیوں کے لیے پینے کا پانی اور ضروری ویٹرنری خدمات بھی دستیاب کرانے پر زور دیا گیا ہے۔

شرد پوار نے قحط کے دوران بجلی کی لوڈ شیڈنگ کا مسئلہ بڑھنے کا حوالہ دیتے ہوئے بجلی کے ٹرانسفارمرز کی مرمت کا کام مقررہ وقت پر مکمل کرانے کے لیے توانائی محکمہ کے ذریعے خصوصی مہم چلانے کا مطالبہ کیا ہے۔ اس کے ساتھ ہی ہر ضلع میں بارش کی مقدار، فصلوں کی صورتحال، پانی کی قلت، چارے کی دستیابی اور مویشیوں کی صورتحال پر روزانہ نظر رکھنے کے لیے ریاستی سطح اور ضلعی سطح پر کنٹرول روم قائم کرنے کی مانگ کی گئی ہے، تاکہ صورتحال کی مسلسل نگرانی کی جاسکے اور ضرورت کے مطابق فوری اقدامات کیے جاسکیں۔

تعلیمی شعبے کے حوالے سے بھی شرد پوار نے اہم مطالبہ کیا ہے۔ قحط جیسی صورتحال سے متاثرہ تعلقوں کے اسکولوں، کالجوں اور دیگر تعلیمی اداروں میں قحط سے متعلق رعایتوں کے تحت صرف امتحانی فیس معاف نہ کی جائے بلکہ زیر تعلیم طلبہ کی مکمل تعلیمی فیس معاف کرنے کا فیصلہ فوری طور پر کیا جائے۔ ان کا کہنا ہے کہ موجودہ صورتحال کا اثر صرف زراعت تک محدود نہیں بلکہ کسانوں، زرعی مزدوروں، مویشیوں اور دیہی زندگی کے مختلف شعبوں پر پڑ رہا ہے، اس لیے حکومت کو تمام پہلوؤں کو مدنظر رکھتے ہوئے فوری امدادی اقدامات کرنے چاہئیں۔

شرد پوار نے امید ظاہر کی ہے کہ کسانوں، زرعی مزدوروں، مویشیوں اور دیہی عوام پر پیدا ہونے والی اس سنگین صورتحال کا احساس کرتے ہوئے وزیر اعلیٰ دیویندر فڑنویس ان مطالبات پر مثبت فیصلہ کریں گے اور ریاست کے متاثرہ علاقوں میں ضروری اقدامات فوری طور پر نافذ کیے جائیں گے۔

ہندوستھان سماچار

--------------------

ہندوستان سماچار / جاوید این اے