نئی دہلی، 18 ستمبر (ہ س)۔بھارتیہ ریلوے نے مہاراشٹر میں سنٹرل ریلوے کے چوک-کرجت سیکشن کے ڈبلنگ پروجیکٹ کو منظوری دے دی ہے۔ 10.86 کلومیٹر طویل اس پروجیکٹ پر 497 کروڑ روپے لاگت آئے گی۔

وزارت ریلوے کے مطابق چوک-کرجت ریل سیکشن پنویل-چوک-کرجت روٹ کا حصہ ہے اور اسے مسافروں اور مال بردار ٹریفک دونوں کے لیے ایک اہم راستہ سمجھا جاتا ہے۔ ڈبلنگ کے بعد موجودہ سنگل ریل لائن کی گنجائش میں اضافہ ہوگا اور ٹرینوں کا آپریشن زیادہ آرام دہ ہوگا۔

وزارت نے بتایا کہ اس پروجیکٹ کو ریلوے نیٹ ورک کی صلاحیت بڑھانے کے لیے ڈبلنگ، ٹرپلنگ، کواڈپلنگ، فلائی اوور اور بائی پاس کے کاموں کے تحت منظوری دی گئی ہے۔

پروجیکٹ کی تکمیل کے بعد اس روٹ پر دونوں سمتوں میں روزانہ پانچ اضافی مسافر ٹرینیں چلانے کی سہولت ہوگی۔ اس کے علاوہ، سالانہ 80.1 کروڑ ٹن اضافی مال لے جانے کی صلاحیت تیار کی جائے گی۔ توقع ہے کہ اس سے مال بردار ٹرینوں کے رکنے اور تاخیر میں بھی کمی آئے گی۔

ہندوستھان سماچار

---------------

ہندوستان سماچار / عبدالسلام صدیقی