سیول، 17 ستمبر (ہ س)۔شمالی کوریا کے رہنما کم جونگ ان کی بہن اور ایک سینئر عہدیدار کم یو جونگ نے بین الاقوامی جوہری ہتھیاروں کے خاتمے کے مطالبات کو مسترد کرتے ہوئے کہا ہے کہ شمالی کوریا کی جوہری ہتھیار رکھنے والی ریاست کی حیثیت مستقل ہے۔

جنوبی کوریا کی سرکاری خبر رساں ایجنسی یونہاپ کے مطابق، کم یو جونگ نے جمعرات کو جاری کردہ ایک بیان میں بین الاقوامی جوہری توانائی ایجنسی (آئی اے ای اے) کے مطالبات کو مسترد کر دیا۔ ان کا یہ بیان آسٹریا کے شہر ویانا میں آئی اے ای اے کے جاری 70 ویں جنرل کانفرنس اجلاس کے دوران سامنے آیا۔

آئی اے ای اے کانفرنس میں شمالی کوریا کی بڑھتی ہوئی جوہری صلاحیتوں پر تشویش کا اظہار کیا گیا ہے۔ ایجنسی نے پیانگ یانگ سے مطالبہ کیا ہے کہ وہ جوہری عدم پھیلاو کے معاہدے (این پی ٹی) کے تحت اپنے جوہری ہتھیاروں کے پروگرام کو مکمل، تصدیق اور مستقل طور پر ختم کرے۔

کانفرنس سے قبل جاری کی گئی آئی اے ای اے کی سیف گارڈز رپورٹ میں شمالی کوریا کی یورینیم کی افزودگی کی صلاحیت میں اضافے اور اہم جوہری تنصیبات کی توسیع کا بھی ذکر کیا گیا۔

کم یو جونگ نے ان مطالبات کو مسترد کرتے ہوئے کہا کہ آئی اے ای اے اور مغربی ممالک کے اجلاسوں اور جوہری ہتھیاروں کو ختم کرنے کے مطالبات کا شمالی کوریا کی پالیسی پر کوئی اثر نہیں پڑے گا۔ انہوں نے کہا کہ ملک اپنے قومی مفادات اور سلامتی کے تحفظ کے لیے ضروری اقدامات کرتا رہے گا۔

کم یو جونگ نے کہا کہ جوہری ہتھیار رکھنے والی ریاست کے طور پر شمالی کوریا کی حیثیت غیر متزلزل ہے اور اسے کسی بیرونی دباو سے تبدیل نہیں کیا جا سکتا۔ انہوں نے یہ بھی کہا کہ ملک کی جوہری صلاحیت میں ہونے والی تبدیلیوں کو کوئی بھی پلٹ نہیں سکتا۔

ان کے تبصرے اس وقت سامنے آئے ہیں جب امریکی صدر ڈونلڈ ٹرمپ نے شمالی کوریا کے رہنما کم جونگ ان کے ساتھ ممکنہ سربراہی اجلاس میں دلچسپی کا اظہار کیا ہے۔

جنوبی کوریا کی وزارت اتحاد کے ایک عہدیدار نے کہا کہ وزارت کم یو جونگ کے بیان پر نظر رکھے ہوئے ہے۔ عہدیدار کے مطابق اس بیان کو امریکہ اور شمالی کوریا کے درمیان ممکنہ سربراہی اجلاس میں جوہری ہتھیاروں کے خاتمے کے معاملے پر پیانگ یانگ کے موقف کو واضح کرنے کے اشارے کے طور پر دیکھا جا رہا ہے۔

اس دوران، شمالی کوریا کی وزارت دفاع کے ترجمان نے بڑے پیمانے پر تباہی پھیلانے والے ہتھیاروں (ڈبلیو ایم ڈی) سے نمٹنے کے لیے امریکہ اور جنوبی کوریا کے درمیان حالیہ ملاقات پر تنقید کی۔

گزشتہ ہفتے مشترکہ ڈبلیو ایم ڈی جوابی اقدامات کمیٹی کے سالانہ اجلاس میں، سیول اور واشنگٹن نے شمالی کوریا کے جوہری اور میزائل پروگراموں کی روشنی میں ڈبلیو ایم ڈی سے متعلق معلومات کے اشتراک کے عمل کو مضبوط کرنے پر اتفاق کیا۔

خیال کیا جاتا ہے کہ شمالی کوریا کا یہ بیان 2017 میں دونوں ممالک کی طرف سے تشکیل دی گئی اس ڈائریکٹر سطح کی مشاورتی کمیٹی کے اجلاس کا پہلا سرکاری جواب ہے۔

ہندوستھان سماچار

---------------

ہندوستان سماچار / عبدالسلام صدیقی