نئی دہلی، 16 ستمبر (ہ س)۔ بین الاقوامی فٹبال سے ریٹائرمنٹ کا اعلان کرنے کے چند ہفتے بعد عظیم کھلاڑی لیونل میسی کو اکتوبر میں ہونے والے دوستانہ میچوں کے لیے ارجنٹینا کی ٹیم میں شامل کیا گیا ہے۔ ارجنٹینا فٹبال ایسوسی ایشن کے صدر کلاوڈیو تاپیا نے تصدیق کی ہے کہ میسی کو قومی ٹیم کی جانب سے وداعی میچ کھیلنے کی دعوت دی گئی ہے۔
تاپیا نے سوشل میڈیا پر کہا، ”ہم نے دنیا کے بہترین کھلاڑی، اپنی ٹیم کے آئیکن اور کپتان لیونل میسی کو 6 اکتوبر کو ارجنٹینا میں اپنی ٹیم کی جانب سے شاندار وداعی میچ کھیلنے کی دعوت دی ہے۔“ارجنٹینا اکتوبر کی بین الاقوامی ونڈو کے دوران اپنے ملک میں تین دوستانہ میچ کھیلے گا۔ توقع ہے کہ میسی 6 اکتوبر کو بیونس آئرس میں بینن کے خلاف ہونے والے میچ میں میدان میں اتریں گے۔ اس سے قبل ارجنٹینا 30 ستمبر کو قرطبہ میں بولیویا اور 3 اکتوبر کو بیونس آئرس میں برکینا فاسو کے خلاف کھیلے گا۔
میسی نے حال ہی میں بین الاقوامی فٹبال سے ریٹائرمنٹ کا اعلان کیا تھا۔ ایسے میں 6 اکتوبر کا میچ ان کے لیے قومی ٹیم کی جرسی میں وداعی مقابلہ بن سکتا ہے۔
ارجنٹینا کی ٹیم میں لیاندرو پریڈیز، ناہویل مولینا اور تھیاگو الماڈا شامل نہیں ہوں گے۔ ورلڈ کپ فائنل کے بعد اسپین کے کھلاڑیوں کے ساتھ ہونے والے تنازعہ کے باعث تینوں پر طویل پابندی عائد ہے۔
ہندوستھان سماچار
ہندوستان سماچار / محمد شہزاد
