کولکاتا، 16 ستمبر (ہ س)۔ کولکاتا کے کمیک اسٹریٹ واقع ترنمول کانگریس کے دفتر کو خالی کرنے سے متعلق فائر بریگیڈ کے نوٹس کو کلکتہ ہائی کورٹ نے بدھ کے روز مسترد کر دیا۔ یہ دفتر ترنمول کانگریس کے قومی جنرل سکریٹری ابھیشیک بنرجی سے متعلق ہے۔ جسٹس کرشن راو کی سربراہی والی بنچ نے تاہم فائر بریگیڈ محکمہ کو دفتر کا دوبارہ معائنہ کرنے اور ضروری فائر سیفٹی اقدامات کے سلسلے میں ہدایات جاری کرنے کو کہا ہے۔

سماعت کے دوران ہائی کورٹ نے کہا کہ فائر بریگیڈ محکمہ کو کالی گھاٹ ترنمول کو از سرنو نوٹس دینا ہوگا۔ نوٹس میں یہ واضح کرنا ہوگا کہ محکمہ کے افسران دفتر کا دوبارہ معائنہ کرنے کے لیے کب پہنچیں گے۔ نوٹس جاری ہونے کے بعد فائر بریگیڈ کے افسران کو کمیک اسٹریٹ واقع دفتر کا معائنہ کرنا ہوگا۔

معائنے کے بعد فائر بریگیڈ محکمہ کو بتانا ہوگا کہ دفتر میں فائر سیفٹی اور دیگر حفاظتی معیارات کو پورا کرنے کے لیے کن اقدامات کی ضرورت ہے۔ ترنمول کانگریس کو فائر بریگیڈ محکمہ کی جانب سے جاری ہدایات کے مطابق ضروری حفاظتی انتظامات کرنے ہوں گے۔ اگر ان ہدایات پر عمل نہیں کیا جاتا تو فائر بریگیڈ محکمہ قانون کے مطابق کارروائی کر سکے گا۔

دراصل، کچھ دن قبل فائر بریگیڈ محکمہ نے کمیک اسٹریٹ واقع عمارت کے مالک کو نوٹس جاری کیا تھا۔ اس میں ساتویں اور آٹھویں منزل پر آگ سے بچاو¿ کے انتظامات کو ناکافی قرار دیتے ہوئے دونوں منزلوں کو فوری طور پر خالی کرنے کی ہدایت دی گئی تھی۔ اس کے بعد عمارت کے مالک کی جانب سے ابھیشیک بنرجی کے دفتر کو خالی کرنے کے لیے کہا گیا تھا۔

فائر بریگیڈ کے اس نوٹس کو چیلنج کرتے ہوئے کالی گھاٹ ترنمول کی جانب سے کلکتہ ہائی کورٹ میں عرضی دائر کی گئی تھی۔ سماعت کے دوران عدالت نے پہلے ہی فائر بریگیڈ کے نوٹس پر عبوری روک لگا دی تھی۔ بدھ کے روز عدالت نے معاملے میں نوٹس کو مسترد کرتے ہوئے حفاظتی معیارات کے حوالے سے نئے سرے سے معائنہ اور ضروری ہدایات جاری کرنے کا طریقہ کار طے کر دیا۔

ہندوستھان سماچار

ہندوستان سماچار / محمد شہزاد