نئی دہلی، 14 ستمبر (ہ س)۔ وزیر دفاع راج ناتھ سنگھ سمیت کئی اہم رہنماؤں نے پیر کو ہندی دیوس کے موقع پر ملک کے عوام کو مبارکباد دی۔ رہنماؤں نے ہندی کو ہندوستانی ثقافت، تہذیب اور زندگی کی اقدار کی ترجمانی قرار دیتے ہوئے اسے علم، سائنس، ٹیکنالوجی اور اختراع کے شعبوں میں مزید مضبوط بنانے کی اپیل کی۔

لوک سبھا اسپیکر اوم برلا نے ہندی دیوس پر ملک کے عوام کو مبارکباد دیتے ہوئے کہا کہ ہندی صرف ایک زبان نہیں بلکہ ہندوستان کی ثقافت، تہذیب اور زندگی کی اقدار کی مضبوط ترجمان ہے۔ انہوں نے کہا کہ ہندی ملک کے تنوع کو اتحاد کے دھاگے میں پروتی ہے۔

اوم برلا نے کہا کہ ہندی کی عظمت کو بڑھانا ملک کے مالا مال لسانی اور ثقافتی ورثے کا احترام کرنا ہے۔ انہوں نے لوگوں سے ہندی کے تحفظ، فروغ اور تشہیر کا عزم کرنے کی اپیل کی۔ ساتھ ہی انہوں نے علم، سائنس، ٹیکنالوجی اور اختراع کے شعبوں میں ہندی کو مزید مضبوط بنانے پر زور دیا۔

وزیر دفاع راج ناتھ سنگھ نے بھی ہندی دیوس پر ملک کے عوام کو مبارکباد دی۔ انہوں نے کہا کہ ہندی ہندوستان کی ثقافت، تہذیب اور زندگی کی اقدار کی مضبوط ترجمان ہے۔ یہ زبان ملک کے تنوع کو اتحاد کے دھاگے میں باندھنے کا کام کرتی ہے۔

وزیر دفاع نے کہا کہ ہندی کی عظمت کو بڑھانا ہندوستانی لسانی اور ثقافتی ورثے کا احترام ہے۔ ہندی کے تحفظ، فروغ اور تشہیر کے ساتھ ساتھ علم، سائنس، ٹیکنالوجی اور اختراع کے شعبوں میں اسے زیادہ مؤثر بنانے کے لیے اجتماعی کوششیں کی جانی چاہئیں۔

مرکزی وزیر داخلہ و تعاون امت شاہ نے کہا کہ سرکاری زبان کے طور پر ہندی عوامی رابطے، بہتر حکمرانی اور قومی اتحاد کو مضبوط بنانے میں اہم کردار ادا کر رہی ہے۔ انہوں نے کہا کہ تمام ہندوستانی زبانوں کے ساتھ آگے بڑھتے ہوئے ہندی اب ٹیکنالوجی اور تحقیق کے شعبے میں بھی اپنی جگہ بنا رہی ہے۔

شاہ نے ہندی دیوس کے موقع پر لوگوں سے ہندی سمیت تمام ہندوستانی زبانوں کو مضبوط بنانے کا عزم کرنے کی اپیل کی۔ انہوں نے کہا کہ ہندوستانی زبانوں کی ترقی ملک کے لسانی اور ثقافتی ورثے کو مضبوط بنانے کے ساتھ ساتھ خود کفیل ہندوستان کی سمت میں بھی اہم ہے۔

مرکزی وزیر برائے سائنس و ٹیکنالوجی ڈاکٹر جتیندر سنگھ نے کہا کہ ہندی ایک ایسی مانوس زبان ہے جو لوگوں کے خیالات، جذبات اور اقدار کو آپس میں جوڑتی ہے۔ انہوں نے لوگوں سے مل کر ہندی کی عظمت بڑھانے اور اس کی مسلسل ترقی میں اپنا کردار ادا کرنے کی اپیل کی۔

قابل ذکر ہے کہ ملک میں ہر سال 14 ستمبر کو ہندی دیوس منایا جاتا ہے۔ اسی دن 1949 میں آئین ساز اسمبلی نے ہندی کو دیوناگری رسم الخط میں بھارتی وفاق کی سرکاری زبان کے طور پر تسلیم کیا تھا۔ ہندی دیوس کے ذریعے ہندی کے استعمال کو فروغ دینے کے ساتھ ہندوستانی زبانوں کی مالا مال روایت اور لسانی تنوع کے تحفظ پر بھی زور دیا جاتا ہے۔

ہندوستھان سماچار

---------------

ہندوستان سماچار / عبدالواحد