کوئٹہ، 11 ستمبر (ہ س)۔ پاکستان کے بلوچستان میں آزادی کی حامی مسلح تنظیم بلوچ لبریشن آرمی (بی ایل اے) نے 3 ستمبر کو پشین کے زیارت کراس میں پاکستانی فوج اور ایک تعمیراتی کمپنی پر کیے گئے حملوں کی ویڈیو جاری کی ہے۔ تنظیم نے یہ ویڈیو اپنے آفیشل چینل ’’ہُکل‘‘ پر جاری کی ہے۔ویڈیو کے ابتدائی مناظر میں بی ایل اے کی اہم شاخ ’’فتح اسکواڈ‘‘ کے کمانڈروں کو فوجی نظم و ضبط کے ساتھ دکھایا گیا ہے۔ تمام کمانڈروں کو جدید ہتھیاروں اور مخصوص یونیفارم میں دکھایا گیا ہے۔

’دی بلوچستان پوسٹ‘ کی 10 ستمبر کو نشر کی گئی رپورٹ کے مطابق تقریباً سات منٹ کی اس ویڈیو میں ان کمانڈروں کو بھاری ہتھیاروں اور راکٹوں کے ذریعے پاکستانی فوج کے ایک قافلے کو نشانہ بناتے ہوئے دکھایا گیا ہے۔ ویڈیو میں فوجی اہلکاروں کی لاشیں بھی دکھائی گئی ہیں۔

بی ایل اے کے مطابق 3 ستمبر کو فتح اسکواڈ نے پشین کے زیارت کراس میں پاکستانی فوج کے قافلے کو نشانہ بنایا۔ اس دوران قلعہ سیف اللہ اسکاؤٹس اور ایف سی 134 ونگ کی چار گاڑیوں پر حملہ کیا گیا۔ حملے میں فوج کے ایک ٹرک سمیت دو گاڑیاں تباہ ہوگئیں۔بی ایل اے کا دعویٰ ہے کہ حملے میں پاکستانی فوج کے 18 اہلکار ہلاک ہوئے اور ان کے تمام ہتھیار قبضے میں لے لیے گئے۔ تنظیم کے مطابق اس کے بعد زیارت کراس کے قریب خانی بابا میں ایک تعمیراتی کمپنی کی سائٹ پر قبضہ کیا گیا اور گاڑیوں سمیت 14 بھاری مشینیں تباہ کردی گئیں۔رپورٹ کے مطابق دونوں واقعات کی پاکستانی فوج تصدیق کرچکی ہے۔

ہندوستھان سماچار

ہندوستان سماچار / Mohammad Khan