جماعتِ اسلامی ہند عثمان پور میں شاستری پارک یونٹ کے تحت درسِ قرآن و درسِ حدیث کا انعقاد

نئی دہلی،10 ستمبر(ہ س )۔ جماعتِ اسلامی ہند عثمان پور میں شاستری پارک یونٹ کے تحت آج درسِ قرآن کا پروگرام منعقد ہوا۔ اس موقع پر عبدالغفار صاحب نے سورۂ مریم کی آیات 41 تا 50 کا ترجمہ اور تفسیری تشریح پیش کی۔ انہوں نے ان آیات کی روشنی میں حضرت ابراہیم علیہ السلام کے ایمان، دعوتِ توحید، اپنے والد کو حق کی طرف بلانے اور اللہ کی راہ میں گھر اور وطن چھوڑنے کے واقعے پر تفصیلی روشنی ڈالی۔

انہوں نے کہا کہ حضرت ابراہیمؑ نے اپنے والد کو نہایت حکمت اور نرمی کے ساتھ سمجھایا کہ جن بتوں کو وہ معبود مانتے ہیں، وہ نہ سنتے ہیں، نہ دیکھتے ہیں اور نہ کسی کو نفع یا نقصان پہنچانے پر قادر ہیں۔ حضرت ابراہیمؑ نے اپنی قوم کے سامنے بھی توحید کی دعوت پیش کی، لیکن جب مخالفت اور مزاحمت بڑھ گئی تو آپؑ نے اللہ کی خاطر اپنے گھر اور وطن کو چھوڑنے کا فیصلہ کیا اور ہجرت کی۔

درس میں بتایا گیا کہ حضرت ابراہیمؑ کی اس قربانی، استقامت اور اللہ پر کامل بھروسے کا صلہ اللہ تعالیٰ نے انہیں اپنی بے شمار نعمتوں سے نواز کر دیا۔ اللہ تعالیٰ نے انہیں حضرت اسماعیلؑ اور حضرت اسحاقؑ جیسے بیٹوں سے نوازا اور دونوں کو نبوت کے منصب پر فائز فرمایا۔ اس طرح حضرت ابراہیمؑ کی پوری زندگی اس بات کی روشن مثال ہے کہ جو شخص اللہ کی خاطر قربانی دیتا ہے، اللہ تعالیٰ اسے دنیا و آخرت میں اپنے فضل سے نوازتا ہے۔

درسِ حدیث میں ہجرتِ حبشہ کے واقعے سے دین کے لیے قربانی کا سبق

پروگرام میں وسیم احمد صاحب نے درسِ حدیث پیش کیا، جس میں ہجرتِ حبشہ کے موضوع پر احادیث اور سیرتِ نبوی ﷺ کی روشنی میں گفتگو کی گئی۔ انہوں نے بتایا کہ مکہ مکرمہ میں اہلِ ایمان پر ظلم و ستم بڑھنے کے بعد رسول اللہ ﷺ نے صحابۂ کرامؓ کو حبشہ کی طرف ہجرت کرنے کی اجازت دی۔ صحابۂ کرامؓ نے اپنے ایمان کی حفاظت اور اللہ تعالیٰ کی رضا کے لیے اپنے گھر، اہل و عیال اور وطن تک کو چھوڑنے کی عظیم قربانی پیش کی۔

درسِ قرآن و درسِ حدیث میں اس بات پر زور دیا گیا کہ قرآن و حدیث کی تعلیمات کو محض سننے تک محدود نہ رکھا جائے بلکہ انہیں اپنی عملی زندگی کا حصہ بنایا جائے۔ حضرت ابراہیمؑ اور صحابۂ کرامؓ کی زندگیوں سے ایمان، توحید، صبر، استقامت، ہجرت اور اللہ تعالیٰ پر کامل اعتماد کا سبق حاصل کیا جائے۔ہندوستھان سماچار

ہندوستان سماچار / Md Owais Owais