چنڈی گڑھ، 9 اگست (ہ س)۔

پنجاب بی جے پی کے صدر کیول سنگھ ڈھلوں نے کہا کہ ریاست میں منشیات، بے روزگاری، قانون و انتظام اور کسانوں کے بحران جیسے مسائل کو لے کر پارٹی نے عوامی رابطہ مہم تیز کر دی ہے۔ انہوں نے کہا کہ بی جے پی گاوں، شہر اور بوتھ کی سطح تک تنظیم کو مضبوط کرتے ہوئے مرکزی حکومت کی اسکیموں اور پالیسیوں کو ہر خاندان تک پہنچانے کی کوشش کر رہی ہے۔

ڈھلوں نے عام آدمی پارٹی حکومت کو نشانہ بناتے ہوئے کہا کہ پنجاب منشیات، بگڑتی ہوئی قانون و انتظام کی صورتحال اور نوجوانوں کے بیرون ملک جانے جیسے سنگین چیلنجز سے دوچار ہے۔ انہوں نے دعویٰ کیا کہ موجودہ حکومت ان مسائل کا موثر حل فراہم کرنے میں ناکام رہی ہے۔ انہوں نے بتایا کہ یوم آزادی کے پیش نظر 9 سے 14 اگست تک پورے پنجاب میں ’ہر گھر ترنگا‘ مہم چلائی جا رہی ہے۔ اس کے تحت اضلاع، شہروں اور گاوں میں ترنگا یاترائیں نکالی جائیں گی اور لوگوں کو اپنے گھروں پر قومی پرچم لہرانے کے لیے ترغیب دی جائے گی۔

ڈھلوں نے کہا کہ گرو رویداس جی کی 650ویں جینتی کے سلسلے میں جاری ’سماجی ہم آہنگی عزم مہم‘ کے تحت مقدس مٹی کی کلش یاترا پنجاب کے مختلف حصوں، بالخصوص دوآبہ علاقے میں پہنچ رہی ہے۔ انہوں نے کہا کہ اس کا مقصد گرو رویداس جی کی تعلیمات اور سماجی ہم آہنگی کے پیغام کو ہر شخص تک پہنچانا ہے۔

ریاستی صدر نے بتایا کہ 2027 کے اسمبلی انتخابات کی تیاریوں کے سلسلے میں دہلی میں بی جے پی کے قومی صدر نتن نوین اور ریاستی انچارج ستیش پونیا کے ساتھ میٹنگ ہوئی۔ اس میں زراعت، نوجوانوں، سرحدی سلامتی اور شہری ترقی سے متعلق مسائل پر مستقبل کی حکمت عملی پر تبادلہ خیال کیا گیا۔ ڈھلوں نے کہا کہ آنے والے دنوں میں ہر ضلع، منڈل اور گاو¿ں کی سطح پر تنظیمی ٹیموں کو مزید مضبوط کیا جائے گا۔

ہندوستھان سماچار

ہندوستان سماچار / عطاءاللہ