نئی دہلی، 9 اگست (ہ س)۔
کیٹ کے قومی جنرل سکریٹری اور چاندنی چوک سے رکن پارلیمنٹ پروین کھنڈیلوال نے اتوار کو بھارت منڈپم میں بھارتی تجارتی میلے کا بھومی پوجن کیا۔ انہوں نے کہا کہ یہ صرف تجارتی نمائش نہیں بلکہ ’میک ان انڈیا، میڈ فار انڈیا، میڈ فار ورلڈ‘ کے جذبے کا جیتا جاگتا مظاہرہ ہوگا۔ بھارت منڈپم میں 12 سے 15 اگست تک منعقد ہونے والے اس میلے کا افتتاح مرکزی وزیر داخلہ امت شاہ کریں گے۔
کھنڈیلوال نے اتوار کو بھارت منڈپم میں بھومی پوجن کے بعد میلے کی باضابطہ تیاریوں کا جائزہ لیتے ہوئے کہا کہ ہندوستان کی تجارتی طاقت، کاروباری صلاحیت، اختراع اور خود کفیل ہندوستان کے عزم کو ایک شاندار پلیٹ فارم فراہم کرنے والے اس میلے کا مشترکہ انعقاد کنفیڈریشن آف آل انڈیا ٹریڈرز (کیٹ) اور انڈیا ٹریڈ پروموشن آرگنائزیشن (آئی ٹی پی او) کر رہے ہیں۔
کھنڈیلوال نے کہا کہ ملک کی مختلف ریاستوں اور خطوں کی بھارتی مصنوعات، روایتی دستکاری، جدید مینوفیکچرنگ، مائیکرو، اسمال اینڈ میڈیم انٹرپرائزز (ایم ایس ایم ای)، اسٹارٹ اپس اور برانڈز کی وسیع نمائش کے ساتھ بی وی ایم 2026 میں کچھ خصوصی تھیم پویلین بھی ہوں گے، جو اسے عام تجارتی میلوں سے الگ شناخت دیں گے۔
کھنڈیلوال نے بتایا کہ مختلف ممالک کے ساتھ کیے گئے آزاد تجارتی معاہدوں (ایف ٹی اے) پر مبنی خصوصی پویلین تاجروں اور کاروباری افراد کو یہ بتائے گا کہ بدلتے ہوئے عالمی تجارتی منظرنامے میں بھارتی مصنوعات کے لیے نئی منڈیاں اور برآمدات کے مواقع کہاں موجود ہیں۔ یہ پویلین خصوصی طور پر ’لوکل ٹو گلوبل‘ کے عزم کو عملی جامہ پہنانے کا ذریعہ بنے گا۔
کیٹ کے جنرل سکریٹری نے کہا کہ وزیراعظم نریندر مودی کی قیادت میں گزشتہ 12 برسوں کے دوران ہندوستان کے ترقیاتی سفر، اقتصادی تبدیلی، بنیادی ڈھانچے کی توسیع، ڈیجیٹل انقلاب، اسٹارٹ اپ ایکو سسٹم، میک ان انڈیا، خود کفیل ہندوستان، عالمی سطح پر ہندوستان کی بڑھتی ہوئی ساکھ اور قومی فخر سے وابستہ اہم کامیابیوں کو خصوصی طور پر پیش کیا جائے گا۔
کھنڈیلوال نے کہا کہ نوجوان کاروباری افراد، اسٹارٹ اپس، اختراع کاروں اور نئے کاروباری خیالات کی حوصلہ افزائی کے لیے ’اسٹارٹ ہب پویلین‘ خصوصی کشش کا مرکز ہوگا۔ اس کا مقصد نوجوانوں کو صرف ملازمت تلاش کرنے والا نہیں بلکہ ملازمتیں فراہم کرنے والا اور نئے کاروبار قائم کرنے والا ہندوستان بنانے کی سمت میں ترغیب دینا ہے۔
کیٹ کے جنرل سکریٹری نے کہا کہ ملک کی مختلف ریاستوں سے لائی گئی مصنوعات کے ذریعے میلے میں ہندوستان کی گوناگونی، مقامی پیداوار اور علاقائی خصوصیات کا جیتی جاگتی شکل میں مظاہرہ ہوگا۔ انہوں نے کہا کہ ’ایک بھارت، شریشٹھ بھارت‘ کے جذبے کو بازار اور تجارت کے ذریعے پیش کرنے والا یہ شعبہ بھارتی صارفین کو ملک کے مختلف حصوں کی مصنوعات سے جوڑنے کا موقع فراہم کرے گا۔
ہندوستھان سماچار
ہندوستان سماچار / عطاءاللہ
