دہرادون، 31 اگست (ہ س)۔ اتراکھنڈ میں آئندہ پانچ دنوں تک بارش کا سلسلہ جاری رہنے کا امکان ہے۔ محکمہ موسمیات نے پیر کے روز دہرادون، باگیشور، چمولی اور نینی تال میں بعض مقامات پر شدید سے بہت شدید بارش کا الرٹ جاری کیا ہے۔ ان اضلاع میں گرج چمک کے ساتھ آسمانی بجلی گرنے اور بارش کے انتہائی شدید سے نہایت شدید دور کا امکان ہے۔ ٹہری، پوڑی، رودرپریاگ، پتھورا گڑھ، اترکاشی، چمپاوت، الموڑا اور ادھم سنگھ نگر میں بعض مقامات پر شدید بارش ہو سکتی ہے۔

محکمہ موسمیات کے مطابق یکم ستمبر کو پوڑی، اترکاشی، رودرپریاگ، چمولی، باگیشور، چمپاوت، نینی تال اور ہری دوار میں بعض مقامات پر شدید بارش ہونے کا امکان ہے۔ دو ستمبر کو ریاست کے تمام اضلاع میں گرج چمک کے ساتھ شدید سے انتہائی شدید بارش کے دور کی پیش گوئی کی گئی ہے۔ تین ستمبر کو دہرادون، ٹہری، اترکاشی، نینی تال، چمپاوت اور باگیشور میں بعض مقامات پر شدید بارش ہو سکتی ہے، جبکہ چار ستمبر کو تمام اضلاع میں شدید سے انتہائی شدید بارش کا امکان ظاہر کیا گیا ہے۔

ریاستی ایمرجنسی آپریشن سینٹر کی رپورٹ کے مطابق بارش اور دیگر وجوہات کی وجہ سے ریاست میں 103 سڑکیں بند ہیں۔ چمولی میں سب سے زیادہ 23 سڑکیں بند ہیں۔ اس کے علاوہ المورا میں 18، پتھورا گڑھ اور رودرپریاگ میں 14-14، دہرادون میں 11، ٹہری میں 10، نینی تال میں نو، باگیشور میں چھ، چمپاوت میں پانچ، اترکاشی میں چار اور پوڑی میں دو سڑکیں بند ہیں۔

رپورٹ کے مطابق ریاست میں تین قومی شاہراہیں، چار ریاستی شاہراہیں اور دو اہم ضلعی سڑکیں بھی بند ہیں۔ بند تین قومی شاہراہوں میں سے دو بارڈر روڈز آرگنائزیشن کے زیر انتظام ہیں۔

مرکزی آبی کمیشن کے مطابق پیر کی صبح آٹھ بجے رشی کیش میں گنگا کی سطح آب 338.75 میٹر ریکارڈ کی گئی، جو 339.50 میٹر کے انتباہی نشان سے 0.75 میٹر نیچے ہے۔ گزشتہ 24 گھنٹوں کے دوران رشی کیش میں 73.4 ملی میٹر بارش ریکارڈ کی گئی اور دریا کی سطح آب میں اضافہ ہو رہا تھا۔ ہری دوار میں گنگا کی سطح آب 291.92 میٹر رہی، جبکہ انتباہی نشان 293 میٹر ہے۔ بھیما گوڑہ بیراج پر گنگا کی سطح آب 292.10 میٹر اور پانی کا اخراج 85,049 کیوسک ریکارڈ کیا گیا۔

اترکاشی میں بھاگیرتھی کی سطح آب 1119.72 میٹر رہی، جو 1122 میٹر کے انتباہی نشان سے نیچے ہے۔ یہاں گزشتہ 24 گھنٹوں کے دوران 40.8 ملی میٹر بارش ریکارڈ کی گئی اور سطح آب میں اضافے کا رجحان رہا۔

ہندوستھان سماچار

---------------

ہندوستان سماچار / عبدالواحد