نئی دہلی، 31 اگست (ہ س)۔ فیس بک اور انسٹاگرام پر فحش مواد کے نام پر تشہیر کیے جانے والے کچھ خطرناک اینڈرائیڈ ایپس موبائل فون کا کنٹرول حاصل کرکے مالی دھوکہ دہی کا سبب بن سکتے ہیں۔ بھارتی سائبر کرائم کوآرڈینیشن سینٹر (آئی 4سی) کی نیشنل سائبر کرائم تھریٹ اینالیسس یونٹ (این سی ٹی اے یو) نے لوگوں کو ایسے ایپس اور اشتہارات سے محتاط رہنے کی ہدایت دی ہے۔این سی ٹی اے یو کے مطابق ’نائٹ پلے‘، ’ری لوپ‘، ’کس‘، ’ویمو‘، ’ریوو‘، ’نیکسو‘ اور ’وکس‘ جیسے ناموں یا ان سے ملتے جلتے ناموں کے ذریعے ایسے ایپس فیس بک اور انسٹاگرام کے اشتہارات میں پھیلائے جا رہے ہیں۔ اشتہار پر کلک کرنے کے بعد صارفین کو فحش مواد والی ویب سائٹس پر لے جایا جاتا ہے، جہاں انہیں ایپ کی اے پک فائل ڈاؤن لوڈ کرنے کے لیے راغب کیا جاتا ہے۔ایڈوائزری کے مطابق ایپ انسٹال ہونے کے بعد وہ اضافی ایپلی کیشنز انسٹال کرنے کی اجازت طلب کر سکتا ہے۔ اس کے علاوہ ایکسس بلٹی اجازت کا غلط استعمال کرکے یہ موبائل فون کا کنٹرول حاصل کر سکتا ہے اور پس منظر میں فعال رہ سکتا ہے۔کچھ مشتبہ ایپس موبائل فون میں وی پی این بھی انسٹال کر سکتے ہیں، جس کے نتیجے میں صارف کا انٹرنیٹ ٹریفک حملہ آوروں کے زیرِ کنٹرول سرور سے گزر سکتا ہے۔ اس طرح ذاتی معلومات اور دیگر حساس ڈیٹا خطرے میں پڑ سکتے ہیں۔

این سی ٹی اے یو نے لوگوں کو مشورہ دیا ہے کہ ایپس صرف گوگل پلے اسٹور یا دیگر معتبر ایپ اسٹورز سے ہی ڈاؤن لوڈ کیے جائیں۔ اشتہارات، مشتبہ ویب سائٹس یا غیر معروف لنکس کے ذریعے اے پی کے فائل ڈاؤن لوڈ کرنے سے گریز کیا جائے۔

اس کے علاوہ صارفین کو نامعلوم ایپس کو ایکسسبلیٹی کی اجازت نہ دینے، موبائل میں موجود غیر معروف ایپس کا جائزہ لے کر انہیں حذف کرنے، گوگل پلے پروٹیکٹ کو فعال رکھنے اور اینڈرائیڈ ڈیوائس کو تازہ ترین سافٹ ویئر سے اپ ڈیٹ رکھنے کی ہدایت کی گئی ہے۔ بینک اکاؤنٹ اور یو پی آئی لین دین کی بھی باقاعدگی سے جانچ کرنے کا مشورہ دیا گیا ہے۔اگر ایپ دوبارہ انسٹال ہو جائے یا حذف نہ ہو تو اہم ڈیٹا کا بیک اپ لینے کے بعد فون کو ریسٹ فیکٹری کرنے کا مشورہ دیا گیا ہے۔

سائبر فراڈ یا کسی مشتبہ ایپ سے متعلق واقعے کی صورت میں فوری طور پر 1930 ہیلپ لائن پر اطلاع دینے یا cybercrime.gov.in پر شکایت درج کرانے کی اپیل کی گئی ہے۔

ہندوستھان سماچار

ہندوستان سماچار / Mohammad Khan