میڈرڈ، 27 اگست (ہ س)۔ کیلین ایمباپے کی شاندار ہیٹرک کی بدولت ریئل میڈرڈ نے لا لیگا 27-2026 میں بدھ کو ریئل سوسیئداد کو 1-4 سے عبرتناک شکست دی۔ یہ مقابلہ کوچ جوس مورینہو کی سینٹیاگو برنابیو میں واپسی کا پہلا ہوم میچ بھی تھا۔

مورینہو کی ٹیم نے اس سے پہلے ایسپانیول کے خلاف 1-2 سے جیت درج کی تھی، لیکن برنابیو میں سوسیئداد کے خلاف ٹیم نے کہیں زیادہ موثر کارکردگی کا مظاہرہ کیا۔

ایمباپے نے میچ کے پہلے ہاف کے اختتام سے پانچ منٹ قبل فیڈریکو والورڈے کے پاس پر شاندار بائیں پاوں کا شاٹ لگا کر ریئل کو برتری دلائی۔

تاہم، سوسیئداد نے پہلے ہاف کے خاتمے سے قبل برابری کر لی۔ لوکا سوچچ نے ڈیفلیکشن کا فائدہ اٹھاتے ہوئے گیند کو گول کیپر تھیباو کورٹوا کے پار پہنچا دیا۔

دوسرے ہاف میں جوڈ بیلنگہم نے ریئل میڈرڈ کی جیت میں اہم کردار ادا کیا۔ انہوں نے دو گول میں معاونت (اسسٹ) کی۔ پہلے بیلنگہم نے ایمباپے کے ساتھ شاندار تال میل بناتے ہوئے انہیں گیند فراہم کی، جسے ایمباپے نے گول میں تبدیل کر کے ریئل کو دوبارہ برتری دلا دی۔

اس کے بعد بیلنگہم نے زبردست طاقت اور لڑنے کا جذبہ دکھاتے ہوئے گیند کو گول لائن کے قریب سے بچایا اور ونیسیئس جونیئر کو پاس دیا۔ ونیسیئس نے کوئی غلطی نہیں کی اور ریئل کی برتری 1-3 کر دی۔

ایمباپے نے اس کے بعد ونیسیئس کے پاس پر گول کیپر کے اوپر سے شاندار چپ لگا کر اپنی ہیٹرک مکمل کی اور ریئل میڈرڈ کی جیت یقینی بنا دی۔

اس جیت کے ساتھ ریئل میڈرڈ چھ پوائنٹس کے ساتھ لا لیگا ٹیبل میں سرفہرست پہنچ گیا ہے۔ سیویلا اور ریئل بیٹس کے بھی چھ پوائنٹس ہیں۔ ریئل میڈرڈ کا اگلا مقابلہ اتوار کو ملاگا سے ہوگا۔

ہندوستھان سماچار

---------------

ہندوستان سماچار / انظر حسن