نئی دہلی، 24 اگست ( ہ س ) : دہلی-این سی آر میں موسم مکمل طور پر بدل گیا ہے۔ پچھلے دو دنوں سے صبح کی معتدل بارش سے دہلی والوں کو گرمی سے راحت ملی ہے لیکن جگہ جگہ پانی بھرا ہونے کی وجہ سے عام لوگوں کی پریشانیوں میں بھی اضافہ ہوا ہے۔ ہندوستان کے محکمہ موسمیات (آئی ایم ڈی) نے منگل کو بھی ہلکی سے اوسط بارش کا انتباہ دیا ہے۔ صبح کے وقت بادلوں کی مسلسل نقل و حرکت نے موسم کو خوشگوار بنا دیا ہے لیکن دارالحکومت اور اس کے آس پاس کے کئی نشیبی علاقوں میں پانی بھر گیا ہے۔

سڑکوں پر پانی جمع ہونے کی وجہ سے پیدل چلنے والوں کے ساتھ ساتھ موٹر سائیکل سواروں کو بھی مشکلات کا سامنا کرنا پڑ رہا ہے۔ پانی جمع ہونے کا سب سے بڑا اثر دہلی-این سی آر کے ٹریفک نظام پر پڑا ہے۔ جیسے ہی بارش شروع ہوتی ہے، بڑے چوراہوں اور مصروف سڑکوں پر گاڑیاں رک جاتی ہیں۔

جہاں دفتر آنے والے ملازمین کو عام دنوں میں 1 سے 2 گھنٹے لگتے ہیں، وہیں آج انہیں پانی بھر جانے اور ٹریفک جام کی وجہ سے 3 سے 4 گھنٹے کا طویل اور تھکا دینے والا سفر طے کرنا پڑتا ہے۔ ٹریفک جام کے علاوہ لوگوں کو اس دوران پبلک ٹرانسپورٹ کی شدید قلت کا بھی سامنا کرنا پڑتا ہے۔ بارشوں کے دوران ٹیکسی اور آٹو حاصل کرنا انتہائی مشکل ہو جاتا ہے۔ اس کے علاوہ، ایپ پر مبنی کیب ایگریگیٹر سرچارجز یا ڈائنامک پرائسنگ کی وجہ سے مسافروں سے دوگنا کرایہ وصول کرتے ہیں۔

قابل ذکر بات یہ ہے کہ مانسون کے دوران دہلی-این سی آر میں پانی جمع ہونے اور ٹریفک جام کا مسئلہ نیا نہیں ہے۔ ہر بار تھوڑی بارش ہونے پر شہر کا نکاسی کا نظام متاثرہو جاتا ہے۔

ہندوستھان سماچار

--------

ہندوستان سماچار / عبدالواحد