ممبئی ، 20 اگست (ہ س)۔ مہاراشٹر کے نائب وزیر اعلیٰ ایکناتھ شندے نے کہا ہے کہ ورسوا باندرہ سی لنک منصوبے سے متاثرہ ماہی گیروں کے زیر التوا معاوضے کے معاملے کو ٹاٹا انسٹی ٹیوٹ آف سوشل سائنسز کی رپورٹ موصول ہونے کے بعد 2 ماہ کے اندر حل کرنے کی کوشش کی جائے گی۔ انہوں نے کہا کہ ماہی گیروں کو خاطر خواہ معاوضہ فراہم کرنے کے لیے مثبت فیصلہ کیا جائے گا۔ اس سلسلے میں نائب وزیر اعلیٰ ایکناتھ شندے کی صدارت میں ویڈیو کانفرنس کے ذریعے ایک اجلاس منعقد ہوا۔ اجلاس میں ماہی پروری کے وزیر نتیش رانے، محکمہ کے سکریٹری ایم راماسوامی، ایم ایس آر ڈی سی کے منیجنگ ڈائریکٹر انیل کمار گائیکواڑ، سابق رکن اسمبلی کرن پاوسکر اور ماہی گیر تنظیم کے عہدیدار موجود تھے۔ اجلاس میں بتایا گیا کہ ساحلی سڑک منصوبے سے متاثر ہونے والے کچھ ماہی گیروں کو ابھی تک معاوضہ نہیں ملا ہے۔ اس معاملے پر نائب وزیر اعلیٰ نے جلد از جلد مناسب کارروائی کرنے کی ہدایت دی۔ انہوں نے واضح کیا کہ ریاستی حکومت ماہی گیروں کے ساتھ کھڑی ہے اور ان کے مسائل حل کرنے کے لیے پرعزم ہے۔ ماہی گیروں کے نقصان کے معاوضے کے لیے مناسب معیار طے کرنے کی غرض سے ٹاٹا انسٹی ٹیوٹ آف سوشل سائنسز کی جانب سے تفصیلی مطالعہ کیا جا رہا ہے۔ رپورٹ موصول ہونے کے بعد معاوضے کے معاملے میں حتمی کارروائی کی جائے گی۔ اجلاس میں جوہو ورسوا علاقے میں ماہی گیروں کے لیے جیٹی، جال کی مرمت اور فکسنگ کے لیے سہولت، ڈرائنگ یارڈ سمیت دیگر بنیادی ڈھانچے کی سہولیات فراہم کرنے کے معاملے پر بھی تبادلہ خیال کیا گیا۔ ہندوستھان سماچار
--------------------
ہندوستان سماچار / جاوید این اے
