15 سال سے فرار 10 ہزار کا انعامی قاتل گرفتار
نئی دہلی، 02 اگست (ہ س)۔
دہلی پولیس کی کرائم برانچ نے سال 2011 کے مشہور قتل اور لوٹ کے معاملے میں گزشتہ 15 سال سے فرار چل رہے 10 ہزار کے انعامی ملزم کو گرفتار کر لیا ہے۔ ملزم کی شناخت نوشاد عرف للو عرف محمد قمر عالم (37) کے طور پر ہوئی ہے۔
کرائم برانچ کے ڈپٹی کمشنر آف پولیس ہرش اندورا نے اتوار کو بتایا کہ، 6 مارچ 2011 کو شکر پور تھانہ علاقے کے منگل بازار روڈ، لکشمی نگر میں تاجر اتل جین کا گولی مار کر قتل کر دیا گیا تھا۔ وہ گاندھی نگر مارکیٹ میں کمیشن ایجنٹ تھے اور کاروبار کے بعد نقد رقم لے کر گھر لوٹ رہے تھے۔ حادثے والے دن ان کے بیگ میں تقریباً 8.50 لاکھ روپے تھے۔
تحقیقات میں سامنے آیا تھا کہ ملزم ارشد نے اپنے ساتھیوں بھورا عرف مستقیم، ندیم عرف نڈا، نوشاد عرف للو اور ذکی انور کے ساتھ مل کر لوٹ مار کی سازش رچی تھی۔ ملزمان نے اتل جین کو راستے میں روک کر نقد رقم لوٹنے کی کوشش کی۔ مخالفت کرنے پر بھورا اور نوشاد نے ان پر اندھا دھند گولیاں چلا دیں۔ اس کے بعد ملزمان نقد رقم سے بھرا بیگ لے کر فرار ہو گئے۔ زخمی اتل جین کو ڈاکٹر ہیڈگیوار اسپتال لے جایا گیا، جہاں ڈاکٹروں نے انہیں مردہ قرار دے دیا۔
معاملے کی تحقیقات کے دوران قتل، لوٹ، مجرمانہ سازش اور دیگر دفعات جوڑی گئیں۔ اس معاملے میں چار ملزمان کو پہلے ہی گرفتار کر کے عدالت میں مجرم قرار دیا جا چکا تھا، جبکہ نوشاد فرار چل رہا تھا۔ اس کی گرفتاری پر 10 ہزار کا انعام مقرر کیا گیا تھا۔ ڈپٹی کمشنر آف پولیس کے مطابق کرائم برانچ کی سینٹرل رینج کو فرار ملزم کو پکڑنے کی ذمہ داری سونپی گئی۔ انسپکٹر ونئے کمار کی قیادت میں تشکیل دی گئی ٹیم نے طویل عرصے تک تکنیکی نگرانی، انسانی ذرائع سے اطلاع جمع کرنے اور فیلڈ وریفکیشن کے ذریعے ملزم کی سرگرمیوں پر نظر رکھی۔ تحقیقات سے معلوم ہوا کہ گرفتاری سے بچنے کے لیے وہ مسلسل اپنے ٹھکانے بدل رہا تھا اور شناخت چھپا کر رہ رہا تھا۔ بالآخر پولیس کو اطلاع ملی کہ ملزم شاستری پارک فلائی اوور کے پاس آنے والا ہے۔ اطلاع کی بنیاد پر یکم اگست کو جال بچھایا گیا اور ملزم کو شاستری پارک فلائی اوور کے قریب سے دبوچ لیا گیا۔
پوچھ گچھ میں معلوم ہوا کہ نوشاد بنیادی طور پر بہار کے سہرسا ضلع کا رہنے والا ہے۔ وہ شادی شدہ ہے اور دہلی کے مختلف ہفتہ وار بازاروں میں پرانے کپڑے بیچ کر گزر بسر کر رہا تھا۔
ہندوستھان سماچار
ہندوستان سماچار / انظر حسن
