جنیوا،19اگست(ہ س)۔ محمد بن سلمان فاؤنڈیشن (مسک) نے اقوام متحدہ کے یوتھ آفس کے تعاون سے نوجوانوں کے لیے ایک نئے عالمی پلیٹ فارم ’گلوبل یوتھ نیٹ ورک‘ کے قیام کا اعلان کیا ہے۔ اس اقدام کا مقصد دنیا بھر میں نوجوانوں کے لیے کام کرنے والی آزاد تنظیموں کو عالمی پالیسی سازی اور فیصلہ سازی کے عمل سے جوڑنا اور نوجوان قیادت کے لیے نئے مواقع پیدا کرنا ہے۔یہ اعلان جنیوا میں یوتھ اسمبلی کے اجلاس کے دوران عالمی یوم نوجوانان کے موقع پر کیا گیا۔ نیٹ ورک کا باضابطہ آغاز ستمبر 2026 میں نیویارک میں اقوام متحدہ کی جنرل اسمبلی کے اجلاس کے موقع پر متوقع ہے۔
گلوبل یوتھ نیٹ ورک کا بنیادی مقصد نوجوانوں کی فلاح و بہبود اور ترقی کے لیے کام کرنے والی آزاد تنظیموں کو ایک مشترکہ عالمی پلیٹ فارم فراہم کرنا ہے، تاکہ وہ نوجوانوں کی آواز کو بین الاقوامی پالیسی سازی میں مؤثر انداز میں پیش کر سکیں۔نیٹ ورک چار بنیادی شعبوں پر توجہ مرکوز کرے گا۔ ان میں پبلک پالیسی اور نمائندگی کے میدان میں نوجوانوں کی صلاحیتوں کو اجاگر کرنا، اقوام متحدہ اور دیگر عالمی فورمز تک رسائی کے راستے آسان بنانا، کم نمائندگی رکھنے والے نوجوانوں اور مختلف طبقات کی آواز کو مضبوط کرنا اور رکن تنظیموں کو ضروری ڈیٹا، معلومات اور عملی وسائل فراہم کرنا شامل ہے۔
مسک فاؤنڈیشن کے مطابق گلوبل یوتھ نیٹ ورک اپنی نوعیت کا ایک منفرد پلیٹ فارم ہوگا، جو مختلف خطوں میں نوجوانوں کے لیے کام کرنے والی آزاد تنظیموں کو ایک دوسرے سے منسلک کرے گا۔نیٹ ورک کے ذریعے نوجوانوں کو عالمی سطح پر پالیسی سازی اور فیصلہ سازی کے عمل میں زیادہ مؤثر شرکت کے مواقع فراہم کرنے کی کوشش کی جائے گی۔ یہ اقدام مسک فاؤنڈیشن اور اقوام متحدہ کے یوتھ آفس کے درمیان 2018 سے جاری تعاون کا تسلسل بھی قرار دیا جا رہا ہے۔مسک فاؤنڈیشن کے چیف ایگزیکٹو آفیسر ڈاکٹر بدر البدر نے کہا کہ گلوبل یوتھ نیٹ ورک کے ذریعے نوجوانوں اور عالمی فیصلہ سازوں کو ایک پلیٹ فارم پر لایا جا رہا ہے، تاکہ نوجوان بین الاقوامی پالیسیوں کی تشکیل میں فعال کردار ادا کر سکیں۔انہوں نے کہا کہ فاؤنڈیشن نوجوانوں کے وژن اور خیالات کو عملی اوزاروں اور زمینی سطح پر قابلِ عمل حکمت عملیوں میں تبدیل کرنے کی کوشش کرے گی، تاکہ نوجوان اپنے دور کے پیچیدہ چیلنجز کا زیادہ مؤثر انداز میں مقابلہ کر سکیں۔اقوام متحدہ کے یوتھ آفس کے سربراہ اور نوجوانوں کے امور کے اسسٹنٹ سیکرٹری جنرل فیلیپے پولیر نے اس اقدام کا خیرمقدم کرتے ہوئے کہا کہ نوجوانوں کے لیے پائیدار مواقع پیدا کرنا اور انہیں عالمی فیصلہ سازی میں حقیقی اثر و رسوخ دینا انتہائی اہم ہے۔انہوں نے کہا کہ گلوبل یوتھ نیٹ ورک اقوام متحدہ کے یوتھ آفس اور مسک فاؤنڈیشن کے درمیان تعاون کو مزید مضبوط بنانے کے ساتھ نوجوانوں کی عالمی سطح پر شرکت کے لیے ایک مضبوط بنیاد فراہم کرے گا۔
نیٹ ورک کی رکنیت میں پالیسی سازی، تعلیم، شہری شمولیت اور نوجوانوں کی ترقی کے مختلف شعبوں میں سرگرم آزاد تنظیموں کو شامل کیا جائے گا۔مسک فاؤنڈیشن کے مطابق نیٹ ورک کے بانی ارکان کے ذریعے دنیا بھر میں دو کروڑ سے زائد نوجوانوں کی نمائندگی کا ہدف رکھا گیا ہے۔ ستمبر 2026 میں نیویارک میں اقوام متحدہ کی جنرل اسمبلی کے موقع پر اس کے باضابطہ آغاز کے بعد نوجوانوں کی عالمی پالیسی سازی میں شرکت کے لیے اس پلیٹ فارم کی سرگرمیوں کو مزید وسعت دی جائے گی۔
ہندوستھان سماچار
ہندوستان سماچار / Mohammad Khan
