برمنگھم، 16 اگست (ہ س)۔ جرمن جیولن تھرو جولین ویبر نے یورپی ایتھلیٹکس چیمپئن شپ میں شاندار کارکردگی کا مظاہرہ کرتے ہوئے 90.40 میٹر کی تھرو کے ساتھ سونے

کا تمغہ جیت لیا۔ ویبر نے یہ تھرو اپنی آخری کوشش میں کیا اور اس کے ساتھ ہی چیمپئن شپ کا ریکارڈ بھی اپنے نام کر لیا۔

31 سالہ ویبر نے برطانیہ کے اسٹیو بیکلی کا 89.72 میٹر کا پچھلا چیمپئن شپ ریکارڈ توڑا۔ ویبر آخری کوشش سے قبل دوسرے نمبر پر تھے اور ان کے ہم وطن نک تھم ان سے آگے چل رہے تھے۔ لیکن آخری تھرو میں ویبر نے 90.40 میٹر کا فاصلہ طے کر کے سونے کے تمغے پر قبضہ کر لیا۔ اس کارکردگی کے ساتھ ویبر اس سیزن میں 90 میٹر کا ہندسہ عبور کرنے والے دنیا کے محض دوسرے نیزہ باز بن گئے ہیں۔ ان سے قبل سری لنکا کے دولت مشترکہ کھیل کے چیمپئن رمیش پتھیرانگے نے روم ڈائمنڈ لیگ میں 92.67 میٹر کا تھرو کیا تھا۔

ویبر کا 90 میٹر سے زائد کا یہ تیسرا تھرو ہے اور 90.40 میٹر ان کے کیریئر کی تیسری بہترین کارکردگی ہے۔ ان کا انفرادی بہترین ریکارڈ 91.51 میٹر ہے، جو انہوں نے 2025 میں زیورخ ڈائمنڈ لیگ میں قائم کیا تھا۔ اس کے علاوہ انہوں نے گزشتہ سال دوحہ میں 91.06 میٹر کا تھرو کیا تھا۔

سونے کا تمغہ جیتنے کے بعد ویبر نے کہا، ’’میں بہت خوش ہوں کہ میں یہ آخری تھرو میں کر پایا۔ آخری کوشش بالکل درست اور پرفیکٹ تھی۔ یہ ایک شاندار احساس تھا۔ اس تھرو نے خود مجھے بھی حیران کر دیا۔ مجھے یقین نہیں آ رہا تھا۔ مجھے معلوم تھا کہ میں اتنی دور تک نیزہ پھینک سکتا ہوں۔ مجھے معلوم تھا کہ اگر میں نے پوری طاقت لگائی تو میں ایسا کر سکتا ہوں۔ میں بہت شکر گزار اور خوش ہوں کہ یہ کامیاب رہا۔‘‘

ہندوستھان سماچار

---------------

ہندوستان سماچار / انظر حسن