نئی دہلی، 16 اگست (ہ س)۔ یوم آزادی کی تقریبات کے درمیان اتوار کو جواہر لعل نہرو اسٹیڈیم میں فٹنس اور حب الوطنی کا منفرد امتزاج دیکھنے کو ملا۔ فٹ انڈیا سنڈے آن سائیکل کے 86ویں ایڈیشن میں مرکزی مسلح پولیس فورسز کے جوانوں، نوجوان کھلاڑیوں اور فٹنس کے شائقین سمیت ہزاروں افراد نے شرکت کی۔

شرکاء نے سائیکلنگ اور دوڑ کے ساتھ یوگا، فٹنس سرگرمیوں اور حب الوطنی کے گیتوں میں پُرجوش انداز میں حصہ لیا اور نشہ مکت بھارت کے لیے اجتماعی عہد لیا۔

خصوصی پروگرام میں مرکزی ریزرو پولیس فورس (سی آر پی ایف)، مسلح سرحدی فورس (ایس ایس بی)، بھارت-تبت سرحدی پولیس (آئی ٹی بی پی)، بارڈر سیکیورٹی فورس (بی ایس ایف) اور آسام رائفلز کے جوان بھی شامل ہوئے۔ شرکاء نے دو کلومیٹر کی وارم اپ دوڑ اور پانچ کلومیٹر سائیکلنگ میں حصہ لیا۔

عالمی جونیئر اسکواش چیمپئن شپ 2026 میں کانسے کا تمغہ جیتنے والی بھارتی جونیئر ٹیم کا حصہ رہیں یوشا نفیس نے کہا، ’’یوم آزادی کی تقریبات کے ساتھ اس طرح کے پروگراموں کو جوڑنے سے سبھی میں حب الوطنی کا جذبہ بیدار کرنے میں بہت مدد ملتی ہے۔ چونکہ کل یوم آزادی کا موقع تھا اور عام لوگوں میں کافی جوش و خروش ہے، اس لیے ماحول بہت اچھا ہے۔ خاص طور پر تمام بھارتیوں کے لیے یہ بہت خوشی کی بات ہے، کیونکہ یہ مہم 2024 میں شروع ہوئی تھی اور مختلف اضلاع سے تقریباً 40 لاکھ بھارتی اس میں شرکت کر چکے ہیں۔‘‘

2021 میں انڈر-23 عالمی کشتی چیمپئن شپ میں تمغہ جیتنے والی پہلی بھارتی خاتون پہلوان شیوانی پوار نے فٹ انڈیا مہم کو نوجوانوں کے لیے انتہائی اہم قرار دیا۔

انہوں نے کہا، ’’فٹنس نوجوانوں کے لیے سب سے اہم چیز ہے، کیونکہ جب تک ہماری صحت اچھی نہیں ہوگی، ہم کسی بھی شعبے میں بہتر کارکردگی کا مظاہرہ نہیں کر سکتے۔ اس لیے نوجوانوں اور آنے والی نسل کے لیے یہ سب سے ضروری ہے کہ ہم فٹنس کو زیادہ سے زیادہ فروغ دیں۔‘‘

سی آر پی ایف کے انسپکٹر جنرل وکاس کٹھیریا سمیت دیگر شخصیات نے بھی پروگرام میں شرکت کی۔

سابق راجیہ سبھا رکن، صحافی اور مصنف ترون وجے کو فٹ انڈیا چیمپئن قرار دیا گیا۔ ترون وجے نے کہا، ’’فٹ انڈیا ہندوستان کو مضبوط بناتا ہے۔ یہ عام شہریوں کی زندگی کی توانائی میں اضافہ کرتا ہے، ان میں توانائی اور جوش بھرتا ہے اور ترنگے کے وقار و احترام کا جذبہ پیدا کرتا ہے۔ وزیر اعظم نریندر مودی نے فٹ انڈیا مہم شروع کرکے پورے ہندوستان کو نوجوانوں کی صف میں پہلی قطار میں کھڑا کر دیا ہے۔‘‘

پروگرام میں یوگا ٹرینر اور صوفی موسیقار سی اے اتل چاولہ کی خصوصی پیشکش نے حب الوطنی کے رنگ کو دو بالا کر دیا۔ وہیں، راہگیری کی جانب سے پیش کیے گئے ڈرامہ کے ذریعے یوم آزادی اور نشہ مکت بھارت کا پیغام دیا گیا۔

ہندوستھان سماچار

---------------

ہندوستان سماچار / عبدالواحد