نئی دہلی، 14 اگست (ہ س)۔

صدر جمہوریہ دروپدی مرمو نے جمعہ کو راشٹرپتی بھون میں واقع ’امرت اُدھیان‘ کے سالانہ میلے 2026 کا افتتاح کیا۔ ’امرت اُدھیان‘ 16 اگست سے 15 ستمبر تک عام لوگوں کے لیے کھلا رہے گا۔ اس دوران باغ روزانہ صبح 10 بجے سے شام 6 بجے تک کھلا رہے گا، جبکہ آخری داخلہ شام 5 بجے تک دیا جائے گا۔

راشٹرپتی بھون کی جانب سے جاری اطلاع کے مطابق، دیکھ بھال کے لیے ’امرت اُدھیان‘ ہر پیر کو بند رہے گا۔ باغ میں داخلہ مفت ہوگا، تاہم شہریوں کے لیے آن لائن پیشگی بکنگ لازمی ہوگی۔ موقع پر بکنگ کی سہولت دستیاب نہیں ہوگی۔ کسی بھی دن کے لیے آن لائن بکنگ ایک دن قبل صبح 10 بجے بند ہو جائے گی۔

قومی کھیل دن کے موقع پر 29 اگست کو کھلاڑیوں اور یومِ اساتذہ کے موقع پر 5 ستمبر کو اساتذہ کے لیے ’امرت اُدھیان‘ میں خصوصی اور ترجیحی داخلے کا انتظام کیا گیا ہے۔

سیاحوں کا داخلہ اور باہر نکلنا نارتھ ایونیو روڈ کے قریب واقع گیٹ نمبر 35 سے ہوگا۔ سیاح اپنے ساتھ موبائل فون، الیکٹرانک چابی، پرس، ہینڈ بیگ، پانی کی بوتل، شیر خوار بچوں کے لیے دودھ کی بوتل اور چھتری لے جا سکیں گے۔ ان کے علاوہ کسی دوسری چیز کو اندر لے جانے کی اجازت نہیں ہوگی۔

شہریوں کی سہولت کے لیے باغ کے دورے کے راستے میں پینے کے پانی، ابتدائی طبی امداد مرکز، بارش سے بچاؤ کے لیے شیلٹر اور بیت الخلا کا انتظام کیا جائے گا۔ مرکزی سکریٹریٹ میٹرو اسٹیشن سے ’امرت اُدھیان‘ کے داخلی دروازے تک صبح 9:30 بجے سے شام 6 بجے تک ہر 30 منٹ کے وقفے سے مفت شٹل بس سروس بھی دستیاب ہوگی۔باغ کی سیر کے دوران شہری بال واٹیکا، پلومیریا گارڈن، برگد اُپ ون، بونسائی گارڈن، ببلنگ بروکس، سینٹرل لان، لانگ گارڈن اور سرکلر گارڈن سمیت مختلف خوبصورت اور دلکش مقامات سے لطف اندوز ہو سکیں گے۔

ہندوستھان سماچار

ہندوستان سماچار / Mohammad Khan