ڈھاکہ، 9 جولائی (ہ س) ۔

جنوب مشرقی بنگلہ دیش میں شدید بارش کے دوران ایک مدرسے پر پہاڑی سے ملبہ گرنے سے آٹھ افراد ہلاک ہو گئے۔ ان میں سات طالبات اور ایک ٹیچر شامل ہیں۔ یہ لینڈ سلائیڈنگ بدھ کی سہ پہر اوکھیا کے اے-3 بلاک میں واقع روہنگیا کیمپ 5 میں لڑکیوں کے لیے حافظ مدرسہ میں ہوئی۔ حادثے میں مدرسے کی دیوار گر گئی۔ حادثے کے وقت کلاس روم میں 40 کے قریب لڑکیاں موجود تھیں۔

پرتھم آلو اور ڈھاکہ ٹریبیون اخبارات کی رپورٹوں کے مطابق فائر بریگیڈ کی ٹیموں، مسلح پولیس بٹالین کے اہلکاروں، روہنگیا رضاکاروں اور دیگر نے شام دیر گئے ریسکیو آپریشن کیا، جس میں ملبے سے 13 افراد کو نکالا۔ ان میں سے آٹھ کو مردہ قرار دے دیا گیا، جب کہ پانچ دیگر کو تشویشناک حالت میں ہسپتال لے جایا گیا۔

پناہ گزینوں کے ریلیف اور وطن واپسی کے کمشنر محمد میزان الرحمان نے بتایا کہ چار متاثرین موقع پر اور چار دیگر اسپتال میں دم توڑ گئے۔ ہلاک ہونے والی لڑکیوں میں سے دو کا تعلق ایک ہی خاندان سے تھا۔ ایڈیشنل ڈپٹی انسپکٹر جنرل آف پولیس سراج امین نے بتایا کہ مرنے والوں میں سے چار کی شناخت رشیدہ بیگم (13)، ام نجاتل (13)، ام سلمیٰ (12) اور عمیسہ بی بی (13) کے نام سے ہوئی ہے۔ اسرا بیگم (9)، بیگم جان (15) اور فریسہ بی بی (12) کوتوپالونگ فرینڈ شپ اسپتال میں زیر علاج ہیں۔ تیس طلبہ کو بچا لیا گیا ہے۔ دریں اثناء کاکس بازار میں بارش نے صورتحال مزید خراب کر دی ہے۔ سیلابی پانی نے نشیبی علاقے زیر آب آ گئے ہیں جس سے آمدورفت میں خلل پڑا ہے۔ ضلع بھر میں لینڈ سلائیڈنگ کا خطرہ نمایاں طور پر بڑھ گیا ہے۔

مقامی حکام کے مطابق کاکس بازار میں گزشتہ دو دنوں کے دوران مٹی کے تودے گرنے سے خواتین اور بچوں سمیت کم از کم 10 افراد ہلاک ہو چکے ہیں۔ خراب موسم نے چٹ گاو¿ں میں بھی جانیں لی ہیں۔

حکام کے مطابق منگل کو رنگونیا میں پہاڑی کا ایک حصہ گرنے سے ایک خاتون کی موت ہو گئی، جبکہ پنچلایش تھانے کے تحت رحمان نگر میں دیوار گرنے سے ایک نوجوان ہلاک ہو گیا۔ سیتا کنڈ کے سلیم پور جنگلاتی علاقے میں بدھ کی صبح مٹی تلے دب کر 10 ماہ کے بچے کی موت ہو گئی۔ پنچلیش میں چشمہ پہاڑی پر مٹی کا تودہ گرنے سے 12 سالہ بچی جاں بحق ہو گئی۔ حکام کا کہنا ہے کہ صرف چٹ گاو¿ں شہر میں ایسی 26 ہائی رسک پہاڑیاں ہیں۔ ان میں سے 16 سرکاری اور 10 نجی ہیں۔ ان علاقوں میں 6500 سے زائد خاندان رہتے ہیں۔

ہندوستھان سماچار

ہندوستان سماچار / عطاءاللہ