ہاکی انڈیا نے سب جونیئر مردوں کے قومی کیمپ کے لیے 15 کھلاڑیوں کا انتخاب کیا
نئی دہلی، 06 جولائی (ہ س)۔ ہاکی انڈیا نے 20 سے 25 جولائی تک مسقط، عمان میں منعقد ہونے والی پہلی مردوں کی یوتھ ہاکی -5ایس ایشین چیمپئن شپ 2026 کی تیاری کے لیے سب جونیئر مردوں کے قومی تربیتی کیمپ کے لیے 15 کھلاڑیوں کے ناموں کا اعلان کردیاہے۔
قومی کیمپ 7 سے 18 جولائی تک پنجاب یونیورسٹی، سیکٹر 14، چنڈی گڑھ میں منعقد ہوگا۔ ہندوستانی ٹیم کے سابق کپتان اور چیف کوچ سردار سنگھ کی نگرانی میں نوجوان کھلاڑی ہاکی 5ایس فارمیٹ کی مخصوص تکنیکوں اور حکمت عملیوں کی تربیت کریں گے۔ کیمپ میں شریک تمام 15 کھلاڑی حال ہی میں ختم ہوئے انڈر 18 مردوں کے ایشیا کپ 2026 میں ہندوستانی ٹیم کا حصہ تھے۔ ہندوستان نے فائنل میں میزبان جاپان کو 1-4 سے شکست دے کر طلائی تمغہ جیتاتھا۔
ہاکی انڈیا کا خیال ہے کہ یہ کیمپ ملک کے نوجوان کھلاڑیوں کو بین الاقوامی مرحلے کے لیے تیار کرنے اور جونیئر اور سینئر ہندوستانی ٹیموں کے لیے ان کی مستقبل میں پیش رفت کے لیے ایک اہم قدم ہوگا۔ دو ہفتے کے کیمپ میں کھلاڑیوں کو ہاکی 5 ایس فارمیٹ کی تکنیکی اور حکمت عملی کی باریکیوں سے آشنا کیا جائے گا، ساتھ ہی ان کی بنیادی صلاحیتوں کو بھی تقویت ملے گی۔
ہاکی انڈیا نے اس کیمپ کے کامیاب انعقاد کے لیے پنجاب یونیورسٹی کا شکریہ ادا کیا ہے۔ یونیورسٹی کی وائس چانسلر پروفیسر (ڈاکٹر) رینو وِگ نے بھی کیمپ کا دورہ کیا اور کھلاڑیوں سے ملاقات کی اور مقابلے کے لیے ان کے لیے نیک خواہشات کا اظہار کیا۔ یہ مقابلہ ہندوستانی سب جونیئر کھلاڑیوں کو ہاکی 5 ایس فارمیٹ میں بین الاقوامی تجربہ فراہم کرنے اور مستقبل کے اسٹارس کی تیاری کے لیے ہاکی انڈیا کے طویل مدتی منصوبے کا ایک اہم حصہ ہوگا۔
چیف کوچ سردار سنگھ نے کہا، یہ ان نوجوان کھلاڑیوں کے لیے ایک نئے فارمیٹ میں ہندوستان کی نمائندگی کرنے کا بہترین موقع ہے۔ اگلے دو ہفتوں کے دوران ہمارا مقصد کھلاڑیوں کو ہاکی 5ایس کے تقاضوں سے واقف کرانا اور ان کے بنیادی کھیل کو مضبوط کرنا ہے تاکہ وہ مستقبل میں اس سے فائدہ اٹھا سکیں۔ میں اس کیمپ کے انعقاد میں بہترین تعاون پر پنجاب یونیورسٹی کا بھی شکریہ ادا کرتا ہوں۔
قومی کیمپ کے لیے منتخب کھلاڑی: کرن گوتم، ارمان سورینگ، ساون کمار، انش بہوترا، ارشدیپ سنگھ، کیتن کشواہا، شاہ رخ علی، راہل یادو، رومیت پال، آشیش تانی پورتی، آکاش دیپ، ایوی مانک پوری، سدھارتھ بین، پرہلاد راج بھر اور آیوش رجک شامل ہیں۔
---------------
ہندوستان سماچار / عبدالسلام صدیقی
