نئی دہلی، 6 جولائی (ہ س)۔ راجدھانی دہلی پہلی بار ایک بڑے پروفیشنل باکسنگ ایونٹ کی میزبانی کرنے والی ہے۔ پرو باکسنگ لیگ (پی بی ایل) 6 جولائی کو تالکٹورا انڈور اسٹیڈیم میں شروع ہوگی۔ لیگ کی تیاریاں آخری مراحل میں ہیں۔
جمعہ کو ایونٹ سے قبل اسٹیڈیم میں انتظامات کا جائزہ لینے کے لیے ایک اہم اجلاس ہوا جس میں آرگنائزنگ کمیٹی، متعلقہ اداروں اور عہدیداروں نے شرکت کی۔انڈین امیچور باکسنگ فیڈریشن کے صدر ڈاکٹر راکیش مشرا نے بتایا کہ پرو باکسنگ لیگ کا مقصد محض مقابلوں کا انعقاد نہیں ہے بلکہ ملک میں باکسنگ کو نئی پہچان دلانا اور کھلاڑیوں کو بہتر مواقع فراہم کرنا ہے۔ انہوں نے مزید کہا کہ ایک مضبوط پیشہ ورانہ باکسنگ ڈھانچہ ہندوستانی باکسروں کو بین الاقوامی نمائش فراہم کرے گا، جس سے اولمپکس سمیت اہم مراحل پر مستقبل میں بہتر کارکردگی کی راہ ہموار ہوگی۔
میٹنگ میں موجود ایم ایل اے اشوک گوئل دیوراہا نے کہا کہ اس طرح کے بڑے ایونٹس سے راجدھانی میں کھیلوں کے کلچر کو ایک نئی سمت ملے گی اور نوجوانوں کو باکسنگ جیسے کھیلوں سے منسلک ہونے کی ترغیب ملے گی۔آرگنائزنگ کمیٹی سے وابستہ ششی کانت نے کہا کہ لیگ کو بین الاقوامی سطح کی شکل دینے کے لیے جدید ٹیکنالوجی اور پیشہ ورانہ انتظامات پر خصوصی توجہ دی گئی ہے۔
لیگ میں چار ٹیموں کے کل 32 مکے باز حصہ لیں گے جو وزن کے مختلف زمروں میں اپنی صلاحیتوں کا مظاہرہ کریں گے۔ آرگنائزنگ کمیٹی کا خیال ہے کہ یہ مقابلہ نہ صرف ہندوستانی پروفیشنل باکسنگ کو ایک نئی سمت دے گا بلکہ نوجوان باکسرز کے لیے بھی ایک بڑا پلیٹ فارم ثابت ہوگا۔جنرل سکریٹری راکیش ٹھاکران نے کہا کہ پرو باکسنگ لیگ ہندوستانی مکے بازوں کو قومی اور بین الاقوامی سطح پر فروغ دینے کی طرف ایک اہم اقدام ہے۔
آرگنائزنگ کمیٹی کے کنوینر اور دہلی کے سابق میئر جے پرکاش نے کہا کہ لیگ کو بین الاقوامی معیار کے مطابق منعقد کرنے کی تیاریاں کی گئی ہیں۔ انہوں نے یقین ظاہر کیا کہ یہ ایونٹ ہندوستان کو مستقبل میں عالمی سطح کے پرو باکسنگ مقابلوں کی میزبانی کے لیے ایک مضبوط بنیاد فراہم کرے گا۔
لیگ کی افتتاحی تقریب 6 جولائی کو شام 6 بجکر 45 منٹ پر ہوگی۔ مہمان خصوصی دہلی اسمبلی کے اسپیکر وجیندر گپتا ہوں گے۔ سپریم کورٹ کے سینئر وکیل آر ایس گوسوامی نے کھیل کے شائقین سے اپیل کی ہے کہ وہ اس تاریخی ایونٹ کو کامیاب بنانے کے لیے بڑی تعداد میں شرکت کریں۔
ہندوستھان سماچار
ہندوستان سماچار / محمد شہزاد
