نئی دہلی، 28 جولائی (ہ س): دہلی ہائی کورٹ نے جنتر منتر پر مظاہرین کی مسلسل پولیس کیمرے کی نگرانی کو چیلنج کرنے کے معاملہ پر ایک نئی عرضی داخل کرنے کا مشورہ دیا ہے۔ چیف جسٹس ڈی کے اپادھیائے کی سربراہی والی بنچ نے کہا کہ اسٹینڈرڈ آپریٹنگ پروسیجر اور ڈیٹا پروٹیکشن ایکٹ کی جانچ پڑتال کے بعد ایک نئی عرضی دائر کی جانی چاہیے۔ مقدمے کی اگلی سماعت 25 اگست کو ہوگی۔

جب معاملہ منگل کو سماعت کے لیے بلایا گیا تو درخواست گزار نے التوا کی درخواست کی۔ درخواست گزار کی طرف سے پیش وکیل نے کہا کہ سینئر وکیل نندیتا راؤ معاملے پر بحث کرنے کے لیے کسی اور عدالت میں مصروف ہیں۔ اس پر اے ایس جی چیتن شرما نے کہا کہ دیگر متعلقہ معاملات کی سماعت 11 ستمبر کو ہونی ہے۔ عدالت نے پھر کہا، ہم نے درخواست گزار کو مشورہ دیا تھا کہ وہ ایک بہتر عرضی دائر کرے۔

27 جولائی کو سماعت کے دوران، مرکز کی طرف سے پیش ہوئے اے ایس جی چیتن شرما نے کہا تھا کہ اب احتجاج ختم ہو چکے ہیں اور کوئی نگرانی نہیں ہے، اس لیے اب عرضی کی سماعت کا کوئی فائدہ نہیں ہے۔ درخواست گزار کی طرف سے پیش سینئر وکیل نندیتا راؤ نے اس وقت کہا تھا، ہمارا مطالبہ برقرار ہے اور وہ نگرانی کو غیر قانونی قرار دینے کی کوشش کر رہے ہیں۔ تب عدالت نے کہا تھا کہ بہتر ہوگا کہ آپ عرضی دائر کریں اور ہدایات طلب کریں۔ اگر حکومت کے پاس کوئی طریقہ کار ہے تو وہ بتائیں گے اور ہم احکامات جاری کریں گے۔

اس سے قبل مرکزی حکومت نے نگرانی کا دفاع کرتے ہوئے کہا تھا کہ عوامی مقامات پر رازداری کا مطالبہ مضحکہ خیز ہے۔ اس کے بعد درخواست گزار کی جانب سے کہا گیا کہ عوامی مقامات پر مظاہروں کے دوران رازداری کے حقوق بھی موجود ہیں۔ یہ عرضی جے این یو اسٹوڈنٹس یونین کی سابق صدر آئیشی گھوش نے دائر کی ہے۔ درخواست میں جنتر منتر پر کاکروچ جنتا پارٹی کے مظاہرے میں جمع ہونے والے مظاہرین کی پولیس کیمرے کی مسلسل نگرانی کو چیلنج کیا گیا۔ وکلا سبھاش چندران اور انیرودھ کے پی کے ذریعے دائر عرضی میں کہا گیا ہے کہ دہلی پولیس مستقل نگرانی کیمرے کے ساتھ جنتر منتر پر بیٹھے مظاہرین کی مسلسل نگرانی کر رہی ہے۔

عرضی میں کہا گیا ہے کہ دہلی پولیس نے خواتین مظاہرین کی ویڈیو تب بھی بنائی جب وہ شدید بارش کے دوران بھیگی ہوئی تھیں اور جنتر منتر پر چھپنے کی کوئی جگہ نہیں تھی۔ ایسا کرنا جسمانی رازداری اور عزت و ناموس کی سنگین خلاف ورزی ہے۔ عرضی میں کہا گیا ہے کہ دہلی پولیس سے بار بار پوچھا گیا کہ مسلسل نگرانی کا اختیار کس نے دیا یا وہ کن قانونی دفعات کے تحت ایسا کر رہے تھے، جس کا انہوں نے جواب نہیں دیا۔ عرضی میں پرائیویسی کے حق پر جسٹس کے ایس پٹوسوامی کے سپریم کورٹ کے فیصلے کا حوالہ دیا گیا ہے۔ عرضی میں کہا گیا ہے کہ ایسا کرکے دہلی پولیس آئین کے آرٹیکل 1 اور 21 کی خلاف ورزی کر رہی ہے۔

ہندوستھان سماچار

----------

ہندوستان سماچار / عبدالواحد