نئی دہلی، 27 جولائی(ہ س)۔ عام آدمی پارٹی (آپ) کے قومی کنوینر اور دہلی کے سابق وزیر اعلیٰ اروند کیجریوال نے اعلان کیا ہے کہ پارٹی یکم اگست کو نئی دہلی کے کانسٹی ٹیوشن کلب میں ’نیشنل ٹاؤن ہال اگینسٹ ای20‘ کا انعقاد کرے گی۔ اس پروگرام کا مقصد ای20 ایندھن سے متعلق مسائل پر ماہرین، متاثرہ گاڑی مالکان اور عام شہریوں کو ایک مشترکہ پلیٹ فارم فراہم کرنا ہے۔

پیر کے روز پارٹی دفتر میں پریس کانفرنس سے خطاب کرتے ہوئے اروند کیجریوال نے کہا کہ ملک بھر سے ای20 ایندھن کے حوالے سے شکایات موصول ہو رہی ہیں۔ ان کے مطابق اس ایندھن کے استعمال سے گاڑیوں میں خرابی پیدا ہو رہی ہے اور مائلیج بھی متاثر ہو رہی ہے۔ انہوں نے وزیر اعظم نریندر مودی سے مطالبہ کیا کہ وہ اس معاملے میں مداخلت کرتے ہوئے مناسب حل نکالیں۔

کیجریوال نے کہا کہ جس طرح نوجوانوں کی متحدہ آواز کے بعد مرکزی وزیر دھرمیندر پردھان کو استعفیٰ دینا پڑا، اسی طرح ای20 کے مسئلے پر بھی عوام کو متحد ہو کر اپنی آواز بلند کرنی ہوگی۔ ان کا کہنا تھا کہ حکومت کو چاہیے کہ معاملہ مزید سنگین ہونے سے پہلے ہی اس کا حل تلاش کرے۔

انہوں نے بتایا کہ ’نیشنل ٹاؤن ہال اگینسٹ ای20‘ یکم اگست کو دوپہر 12 بجے شروع ہوگا، جبکہ دہلی اور اس کے آس پاس کے علاقوں کے لوگوں سے اپیل کی گئی ہے کہ وہ صبح 11:30 بجے تک کانسٹی ٹیوشن کلب پہنچ جائیں۔

کیجریوال نے کہا کہ دہلی سے باہر رہنے والے افراد بھی آن لائن اس پروگرام میں شرکت کر سکیں گے۔ اس کے لیے انہیں 8583212 8583212 نمبر پر واٹس ایپ پیغام بھیجنا ہوگا، جس کے بعد جمعہ کی شام تک آن لائن شرکت کا لنک فراہم کر دیا جائے گا۔انہوں نے مزید کہا کہ اس ٹاؤن ہال میں ای20 سے متعلق ماہرین، متاثرہ گاڑی مالکان اور اس موضوع میں دلچسپی رکھنے والے افراد اپنے خیالات کا اظہار کریں گے۔ اس موقع پر آئندہ کی حکمت عملی بھی طے کی جائے گی کہ حکومت پر ای20 پالیسی واپس لینے کے لیے کس طرح مؤثر دباؤ ڈالا جائے۔

اروند کیجریوال نے بتایا کہ وزیر اعظم نریندر مودی کے نام ای 20 ایندھن کے خلاف شروع کی گئی آن لائن درخواست پر اب تک دو لاکھ سے زائد افراد اپنی حمایت درج کرا چکے ہیں۔ انہوں نے کہا کہ وہ آئندہ ہفتے اس درخواست کے سلسلے میں وزیر اعظم سے ملاقات بھی کریں گے اور عوام سے اپیل کی کہ وہ زیادہ سے زیادہ تعداد میں اس پروگرام میں براہِ راست یا آن لائن شریک ہوں۔

ہندوستھان سماچار

ہندوستان سماچار / Mohammad Khan