نئی دہلی، 25 جولائی (ہ س)۔ مرکزی حکومت نے کہا ہے کہ امریکہ نے مبینہ جبری مشقت سے متعلق سیکشن 301 کے تحت کیے گئے اقدامات کے تحت بھارت کو 10 فیصد اضافی محصولات کی نچلی درجہ بندی میں رکھا گیا ہے۔ وزارتِ تجارت و صنعت نے ہفتہ کو جاری ایک بیان میں کہا کہ سیکشن 301 کے تحت امریکہ کی جانب سے عائد کیے گئے 10 فیصد اضافی ٹیرف کے دائرۂ کار سے بھارت کی تقریباً 45 فیصد برآمدات اب بھی باہر ہیں۔ امریکی تجارتی نمائندہ (یو ایس ٹی آر) کے دفتر نے 23 جولائی کو امریکی تجارتی ایکٹ 1974 کے سیکشن 301 کے تحت متعلقہ ممالک پر اضافی ٹیرف عائد کرنے کا اعلان کیا تھا۔

وزارت نے کہا کہ یو ایس ٹی آر نے بھارت سے درآمدات پر اضافی 10 فیصد ٹیرف عائد کیا ہے۔ امریکہ نے ابتدا میں 12.5 فیصد ٹیرف عائد کرنے کی تجویز دی تھی۔ یہ اقدامات بھارت سمیت 60 ممالک کی معیشتوں کے اقدامات، پالیسیوں اور طریقہ کار کی جانچ کے بعد کیے گئے ہیں، جو جبری مشقت سے تیار کردہ اشیا کی درآمد پر پابندی اور اس کے نفاذ سے متعلق ہیں۔

وزارتِ تجارت نے کہا، مسلسل کوششوں کا نتیجہ یہ ہے کہ بھارت کو حتمی اقدامات کے تحت اضافی ٹیرف کی نچلی سطح میں رکھا گیا ہے، جس سے اہم شعبوں میں بھارتی برآمدات کو تقابلی فائدہ حاصل ہوگا۔ وزارت نے مزید کہا کہ امریکہ کو بھارت کی برآمدات کا ایک بڑا حصہ، جس پر اس وقت کوئی اضافی ٹیرف لاگو نہیں ہوتا، 10 فیصد اضافی ٹیرف کے دائرے سے باہر رہے گا۔ ان میں جنیرک ادویات، اسمارٹ فونز اور بعض دیگر مخصوص مصنوعات شامل ہیں۔

اس کے علاوہ یو ایس ٹی آر کے سیکشن 232 اقدامات کے تحت پہلے سے شامل اسٹیل، ایلومینیم اور گاڑیوں کے پرزہ جات جیسے مصنوعات بھی اس اضافی 10 فیصد ٹیرف کے تابع نہیں ہوں گی۔ امریکی تجارتی انتظامیہ کے سیکشن 232 کے تحت عائد ٹیرف محدود استثناؤں کے ساتھ تقریباً تمام ممالک پر لاگو ہوتے ہیں۔ وزارت نے کہا، ان استثناؤں کے باعث اندازاً امریکہ کو بھارت کی برآمدات کا 45 فیصد حصہ اضافی 10 فیصد ٹیرف کے دائرے سے باہر رہے گا۔

وزارت کے مطابق باقی 55 فیصد برآمدات پر اضافی 10 فیصد ٹیرف عائد ہوگا، تاہم بھارت پر اس کا اثر جانچ میں شامل بیشتر معیشتوں کے مقابلے میں نسبتاً کم رہے گا۔ حتمی اقدامات میں مذکور ٹیکسٹائل سے متعلق مخصوص نظام ابھی قائم اور نافذ کیا جانا باقی ہے، اور بھارت اس معاملے پر دوطرفہ تجارتی معاہدے (بی ٹی اے) کے لیے جاری مذاکرات کے تحت امریکہ سے بات چیت جاری رکھے ہوئے ہے۔

وزارت نے کہا، مرکزی حکومت دو فروری کو کیے گئے اعلان اور سات فروری کو جاری مشترکہ بیان کے مطابق بھارت-امریکہ دوطرفہ تجارتی معاہدے کو جلد از جلد مکمل کرنے کے لیے امریکہ کے ساتھ کام کرنے کے عزم پر قائم ہے۔ حتمی اقدامات میں ذکر کردہ ٹیکسٹائل سے متعلق مخصوص طریقۂ کار ابھی تک قائم اور نافذ نہیں کیا گیا ہے۔ بھارت-امریکہ دوطرفہ تجارتی معاہدے کے لیے جاری مذاکرات کے تحت بھارت اس معاملے پر امریکہ کے ساتھ مسلسل بات چیت کر رہا ہے۔

ہندوستھان سماچار

---------------

ہندوستان سماچار / عبدالواحد