کرولی، 23 جولائی (ہ س)۔

ضلع میں قومی شاہراہ-23 پر بدھ کی رات میگزین کے پاس ہوئے سڑک حادثے میں موٹر سائیکل سوار تین نوجوانوں کی موت ہو گئی۔ حادثہ اس وقت پیش آیا، جب موٹر سائیکل سوار ٹرک کو اوور ٹیک کرنے کی کوشش کر رہے تھے۔ اسی دوران سڑک پر اچانک گائے آنے سے موٹر سائیکل بے قابو ہو کر ٹرک سے ٹکرا گئی۔

پولیس کے مطابق حادثے میں بھیم نگر کے ساکن آشیش ولد وشنو اور دھول پور کے پرانی چھاونی میں واقع ڈگریا محلے کے ساکن پون ولد چندر پرکاش کو ضلع اسپتال پہنچانے پر ڈاکٹروں نے مردہ قرار دے دیا۔ وہیں بھیم نگر کے پانڈے کا کنواں کے ساکن ہرش ولد راجو نے علاج کے دوران دم توڑ دیا۔

ایڈیشنل سپرنٹنڈنٹ آف پولیس مہیش مینا نے بتایا کہ ٹرک کو اوور ٹیک کرتے وقت اچانک سڑک پر گائے آنے سے موٹر سائیکل سوار نے گاڑی کو بچانے کی کوشش کی۔ اس سے موٹر سائیکل کا توازن بگڑ گیا اور وہ ٹرک کی زد میں آ گئی۔ حادثہ اتنا شدید تھا کہ تینوں نوجوانوں کی موت ہو گئی۔ حادثے کی اطلاع ملتے ہی بڑی تعداد میں لواحقین اور مقامی لوگ ضلع اسپتال پہنچ گئے۔ اسپتال کے احاطے میں غم کا ماحول رہا۔ پولیس نے تینوں لاشوں کو ضلع اسپتال کے مردہ خانے میں رکھوا دیا ہے۔

متوفی پون کے بھائی پارس نے بتایا کہ پون فوڈ ڈیلیوری کا کام کرتا تھا، جبکہ ہرش ایک ہوٹل میں ملازمت کرتا تھا اور آشیش دکان پر کام کرتا تھا۔ تینوں بنیادی طور پر دھول پور کے پرانی چھاونی علاقے کے ساکن تھے اور طویل عرصے سے کرولی کے بھیم نگر علاقے میں رہ رہے تھے۔

ہندوستھان سماچار

---------------

ہندوستان سماچار / انظر حسن