سیوان، 23 جولائی (ہ س) ۔بہار کے سیوان ضلع کے برہڑیا تھانہ علاقہ کے گیانی موڑ کے شمال میں جلپوروا گاؤں میں جمعرات کی صبح کھیت میں غیر قانونی طور سے لگائے گئے بجلی کے کرنٹ کی زد میں آنے سے 65 سالہ ضعیف خاتون کی موت ہو گئی۔ اسی کرنٹ کی زد میں آنے سےنیل گائے کی بھی موت ہوگئی۔ اس واقعہ سے پورے گاؤں میں غم کا ماحول ہے اور گاؤں والوں میں شدید ناراضگی ہے۔ متوفی کی شناخت جلپوروا گاؤں کے رہنے والے لکشمن سنگھ کی بیوی سنگیتا دیوی (65) کے طور پر ہوئی ہے۔ اہل خانہ اور گاؤں والوں کے مطابق اسی گاؤں کے رہنے والے وریندر سنگھ نے اپنی فصلوں کو نیل گائے سے بچانے کے لیے اپنے کھیت کے اردگرد ننگی تاروں کے ذریعے غیر قانونی طور پر بجلی کا استعمال کیا۔ مبینہ طور پر وہ ہر رات اپنے کھیت کے ارد گرد بجلی کا کرنٹ لگاتا تھا اور صبح ہونے سے پہلے تاروں کو ہٹا دیتا تھا۔بتایا جاتا ہے کہ واقعہ کی صبح سنگیتا دیوی اپنے کھیت میں گئی تھی،اسی دوران وہ بجلی کے تار کی زد میں آگئی۔ جس کے باعث موقع پر ہی موت ہوگئی۔ اسی دوران ایک نیل گائے بھی کرنٹ لگنے سے مر گئی۔واقعہ کی اطلاع ملتے ہی برہڑیا تھانہ پولیس جائے وقوعہ پر پہنچی، لاش کو تحویل میں لے کر ضروری قانونی کارروائی مکمل کی۔ اس کے بعد لاش کو پوسٹ مارٹم کے لیے سیوان صدر اسپتال بھیج دیا گیا۔ اس واقعہ کے بعد گاؤں میں غم و غصے کا ماحول ہے۔ گاؤں والوں نے کھیتوں میں غیر قانونی طور پر بجلی سپلائی کرنے والوں کے خلاف سخت کارروائی کا مطالبہ کیا ہے۔پولیس کا کہنا ہے کہ معاملے کی تحقیقات شروع کر دی گئی ہے۔ پوسٹ مارٹم رپورٹ اور موصول ہونے والی درخواست کی بنیاد پر مزید قانونی کارروائی کی جائے گی۔

ہندوستھان سماچار

ہندوستان سماچار / Mohammad Afzal Hassan