نئی دہلی، 23 جولائی (ہ س)۔ مرکزی تفتیشی بیورو (سی بی آئی) نے کہا کہ نیٹ-یو جی 2024 کے سوالیہ پرچے کی چوری کے معاملے کی تفصیلی تحقیقات میں سنجیو کمار عرف سنجیو مکھیا کے ملوث ہونے کا کوئی ثبوت نہیں ملا ہے۔ سوالیہ پرچہ کی چوری اور تقسیم میں ملوث تمام افراد کی شناخت کر لی گئی ہے اور اس معاملے میں اب تک 45 ملزمین کے خلاف چارج شیٹ دائر کی جا چکی ہے۔

سی بی آئی نے جمعرات کو کہا کہ 2024 میں بہار پولیس نے نیٹ -یوجی کے سوالیہ پرچے کی چوری کا معاملہ درج کیا تھا۔ اس وقت سنجیو کمار عرف سنجیو مکھیا کو ابتدائی شک کی بنیاد پر ملزم بنایا گیا تھا، کیونکہ اس کا نام امتحانی پیپر لیک کے دیگر معاملات میں سامنے آیا ۔ بعد میں اس کیس کو جانچ کے لیے سی بی آئی کے حوالے کر دیا گیا۔ تفتیش کے دوران سوالیہ پرچہ چوری کرنے، تقسیم کرنے اور اس سے فائدہ اٹھانے والے ہر فرد کی نشاندہی کی گئی۔ اس معاملے میں پٹنہ کی مجاز عدالت میں 45 لوگوں کے خلاف کئی چارج شیٹ داخل کی گئی ہیں۔

سی بی آئی کے مطابق، تحقیقات کے دوران سنجیو مکھیا کے کردار کی تفصیلی جانچ کی گئی، لیکن ان کے خلاف کوئی ثبوت نہیں ملا جس سے نیٹ -یوجی 2024 کے سوالیہ پرچے کی چوری یا تقسیم میں ان کے ملوث ہونے کو ثابت کیا جا سکے۔ تحقیقات کے دوران سنجیو مکھیا مفرور تھا۔ بعد میں اسے بہار پولیس نے دیگر معاملات میں گرفتار کیا تھا۔ چونکہ ان کا نام بھی نیٹ-یوجی 2024 کیس میں ایف آئی آر میں تھا، اس لیے سی بی آئی نے اسے پوچھ گچھ کے لیے حراست میں لے لیا۔

سی بی آئی نے کہا کہ تفتیش ان کے ملوث ہونے کے ثبوت کو بے نقاب کرنے میں ناکام رہی، اس لیے اس معاملے میں ان کے خلاف کوئی چارج شیٹ داخل نہیں کی گئی۔ نتیجتاً، انہیں نیٹ-یوجی کیس میں ضمانت مل گئی۔ تاہم، وہ عدالتی حراست میں ہے کیونکہ وہ بہار پولیس کے زیر تفتیش دیگر معاملات میں ملزم ہے۔

نیٹ-یوجی 2024 کے سوالیہ پرچے کی چوری کے معاملے کی مکمل تحقیقات مکمل کر لی گئی ہیں اور اس سازش میں ملوث تمام لوگوں کی شناخت کر کے انصاف کے کٹہرے میں لایا گیا ہے۔ سنجیو مکھیا کو جان بوجھ کر بچانے یا اس کیس سے خارج کرنے کے بارے میں جو دعوے گردش کر رہے ہیں وہ حقیقت میں غلط ہیں۔

ہندوستھان سماچار

ہندوستان سماچار / محمد شہزاد