نئی دہلی، 23 جولائی (ہ س)۔

مرکزی تفتیشی بیورو (سی بی آئی) نے چنڈی گڑھ اسمارٹ سٹی لمیٹڈ (سی ایس سی ایل) اور میونسپل کارپوریشن چنڈی گڑھ کے کھاتوں سے رقم کی مبینہ غبن سے متعلق معاملے میں چنڈی گڑھ اور لدھیانہ میں پانچ مقامات پر چھاپہ مارا ہے۔ تلاشی کے دوران ڈیجیٹل ثبوت، مالیاتی ریکارڈ، جائیداد سے متعلق دستاویزات، الیکٹرانک آلات اور تحقیقات سے متعلق دیگر اہم دستاویزات ضبط کر لی گئی ہیں۔

سی بی آئی کے مطابق، یہ کارروائی آئی ڈی ایف سی فرسٹ بینک میں موجود چنڈی گڑھ اسمارٹ سٹی لمیٹڈ اور میونسپل کارپوریشن چنڈی گڑھ کے کھاتوں سے رقم کے مبینہ غلط استعمال کی تحقیقات کے تحت کی گئی۔ تلاشی مشتبہ مستفید کنندگان، چنڈی گڑھ اسمارٹ سٹی لمیٹڈ کے افسر انوبھو مشرا، متعلقہ نجی اداروں اور دیگر مشتبہ افراد کی رہائشی و کاروباری جگہوں پر کی گئی۔

ایجنسی نے بتایا کہ ضبط شدہ دستاویزات میں اسٹوریج ڈرائیو، ڈیجیٹل دستخط، جائیداد سے متعلق ریکارڈ، مالیاتی لین دین کی دستاویزات، کئی الیکٹرانک آلات اور دیگر اہم مواد شامل ہیں۔ ان تمام دستاویزات اور الیکٹرانک ریکارڈ کا تفصیلی معائنہ اور تجزیہ کیا جا رہا ہے۔

سی بی آئی نے کہا کہ یہ معاملہ آئی ڈی ایف سی فرسٹ بینک کی چنڈی گڑھ سیکٹر-32 برانچ سے متعلق بڑے بینکنگ گھوٹالے کا حصہ ہے۔ الزام ہے کہ ہریانہ حکومت کے آٹھ ڈپارٹمنٹوں سے متعلق تقریباً 504 کروڑ روپے کی سرکاری رقم فرضی یا عدم موجود فکسڈ ڈپازٹ (ایف ڈی) اور دھوکہ دہی کے ذریعے کی گئی ڈیبٹ ٹرانزیکشنز کی مدد سے نکال کر شیل کمپنیوں کے ذریعے منتقل کی گئی۔

ایجنسی نے بتایا کہ اس نے یہ تحقیقات ہریانہ حکومت کی درخواست پر ریاستی ویجیلنس اور اینٹی کرپشن بیورو سے اپنے ہاتھ میں لی تھی۔ ہریانہ سے جڑے معاملے میں اب تک 17 ملزمان کے خلاف چارج شیٹ داخل کی جا چکی ہے۔ ان میں آئی ڈی ایف سی فرسٹ بینک اور اے یو اسمال فائنانس بینک کے چھ بینک افسران، ہریانہ حکومت کے تین پبلک سرونٹس، دو کمپنیاں اور چھ نجی افراد شامل ہیں۔

سی بی آئی نے چنڈی گڑھ یونین ٹیریٹری سے جڑے دو دیگر معاملات کی تحقیقات بھی اپنے ہاتھ میں لی ہیں۔ ان میں ایک معاملہ چنڈی گڑھ اسمارٹ سٹی لمیٹڈ اور میونسپل کارپوریشن چنڈی گڑھ سے متعلق ہے، جبکہ دوسرا چنڈی گڑھ رینیو ایبل انرجی اینڈ سائنس اینڈ ٹیکنالوجی پروموشن سوسائٹی (کریسٹ) سے جڑا ہوا ہے۔

سی ایس سی ایل معاملے میں سی بی آئی پانچ بینک افسران، ایک سی ایس سی ایل افسر اور ایک نجی فرد کے خلاف چارج شیٹ داخل کر چکی ہے۔ وہیں، کریسٹ معاملے میں پانچ بینک افسران، دو کریسٹ افسران، چار نجی افراد اور دو کمپنیوں کے خلاف چارج شیٹ داخل کی گئی ہے۔

ہندوستھان سماچار

---------------

ہندوستان سماچار / انظر حسن