نئی دہلی،22جولائی(ہ س)۔ نجی شعبے کے ایچ ڈی ایف سی بینک کے شیئر میں بدھ کو مسلسل تیسرے کاروباری دن بھی گراوٹ دیکھی گئی، جس کے نتیجے میں بینک کی مارکیٹ ویلیو (مارکیٹ کیپٹلائزیشن) میں تقریباً ایک لاکھ کروڑ روپے کی کمی واقع ہوئی۔ گزشتہ تین دنوں کے دوران مارجن سے متعلق خدشات کے باعث بینک کا شیئر آٹھ فیصد سے زائد گر چکا ہے۔

بامبے اسٹاک ایکسچینج (بی ایس ای) میں بینک کا شیئر 1.09 فیصد کی کمی کے ساتھ 1,753.15 روپے پر بند ہوا۔ کاروبار کے دوران ایک وقت یہ 1.47 فیصد گر کر 1,750.25 روپے تک پہنچ گیا تھا۔ اسی طرح نیشنل اسٹاک ایکسچینج(این ایس ای) میں بھی شیئر تقریباً ایک فیصد کی گراوٹ کے ساتھ 1,753.15 روپے پر بند ہوا۔

اسٹاک مارکیٹ کے اعداد و شمار کے مطابق گزشتہ تین دنوں میں ایچ ڈی ایف سی بینک کے شیئر کی قیمت میں 8.11 فیصد کی کمی آئی، جس کے باعث بینک کی مارکیٹ ویلیو گھٹ کر 11 لاکھ 59 ہزار 950.98 کروڑ روپے رہ گئی۔

اس گراوٹ کے بعد مارکیٹ کیپٹلائزیشن کے اعتبار سے ایچ ڈی ایف سی بینک تیسرے نمبر پر آ گیا ہے، جبکہ بھارتی ایئرٹیل 12 لاکھ 16 ہزار 839.14 کروڑ روپے کی مارکیٹ ویلیو کے ساتھ ملک کی دوسری سب سے قیمتی کمپنی بن گئی ہے۔ ریلائنس انڈسٹریز لمیٹڈ 17 لاکھ 44 ہزار 141.25 کروڑ روپے کی مارکیٹ ویلیو کے ساتھ بدستور پہلے نمبر پر برقرار ہے۔

قابلِ ذکر ہے کہ ایچ ڈی ایف سی بینک کا رواں مالی سال 2026-27 کی اپریل تا جون سہ ماہی میں خالص منافع 5 فیصد بڑھ کر 19,059.72 کروڑ روپے رہا، جبکہ گزشتہ مالی سال کی اسی مدت میں یہ 18,155.21 کروڑ روپے تھا۔تاہم پہلی سہ ماہی کے دوران بینک کی کل آمدنی کم ہو کر 92,184 کروڑ روپے رہ گئی، جو گزشتہ مالی سال کی اسی مدت میں 99,200 کروڑ روپے تھی۔

ہندوستھان سماچار

ہندوستان سماچار / Mohammad Khan