امراؤتی،20 جولائی(ہ س)۔

سائبر فراڈ سے حاصل کی گئی رقم کی لین دین کے لیے ایک خاتون کے بینک کھاتے کا استعمال کرتے ہوئے لاکھوں روپے کے مالی معاملات انجام دینے کے الزام میں امراؤتی شہر کے تین افراد کے خلاف سائبر پولیس نے دھوکہ دہی کا مقدمہ درج کر کے مزید تحقیقات شروع کر دی ہیں۔ سائبرپولیس کے مطابق ملزمان کی شناخت وجے مہیش لال جھامنانی، میورموٹوانی اور نکھلیش جے رام داس رام رکھیانی، ساکنان رامپوری کیمپ، امراؤتی کے طور پر ہوئی ہے۔ تینوں کاروباری ہیں۔پولیس کے مطابق ملزمان نے ایک خاتون کو یہ کہہ کر گمراہ کیا کہ جائیداد کی فروخت کے سودے کے تحت 60 لاکھ روپے اس کے بینک کھاتے میں جمع ہونے والے ہیں۔ اس بہانے انہوں نے خاتون سے اس کا بینک پاس بک، اے ٹی ایم کارڈ اور بینک کھاتے سے منسلک موبائل نمبر کا سم کارڈ اپنے قبضے میں لے لیا۔ اس کے بدلے خاتون کو مالی فائدہ پہنچانے کا لالچ بھی دیا گیا تھا۔بعد ازاں خاتون کے بینک کھاتے میں بڑے پیمانے پر مالی لین دین ہونے کا انکشاف ہوا۔ تحقیقات کے دوران معلوم ہوا کہ سائبر فراڈ سے حاصل کی گئی رقم اسی بینک کھاتے میں منتقل کی جارہی تھی۔ معاملے کا علم ہونے پر متاثرہ خاتون نےامراؤتی سٹی پولیس کمشنریٹ کے سائبر پولیس اسٹیشن میں شکایت درج کرائی۔ شکایت کی بنیادپرسائبر پولیس نے تینوں ملزمان کے خلاف متعلقہ دفعات کے تحت مقدمہ درج کر لیا ہے اور اس پورے معاملے کی مزید تفتیش جاری ہے تاکہ فراڈ کے نیٹ ورک اورمالی لین دین کی مکمل حقیقت سامنے آسکے۔دریں اثنا، چند روز قبل بھی مسابقتی امتحانات کی تیاری کرنے والے ایک نوجوان کے بینک کھاتے کومالی فائدے کا لالچ دے کر سائبر فراڈ میں استعمال کیے جانے کے معاملے میں دوافراد کے خلاف مقدمہ درج کیا گیا تھا۔ ان مسلسل سامنے آنے والے معاملات کے پیش نظرسائبر پولیس نے شہریوں سے اپیل کی ہے کہ وہ اپنا بینک کھاتہ، اے ٹی ایم کارڈ، پاس بک یا سم کارڈ کسی بھی شخص کے حوالے نہ کریں، کیونکہ ایسے ذرائع سائبر جرائم میں استعمال کیے جا سکتے ہیں، جس سے کھاتہ داربھی قانونی کارروائی کی زد میں آ سکتا ہے۔ہندوستھان سماچار

ہندوستان سماچار / جاوید این اے