ممبئی ، 16 جولائی (ہ س) بھارت کے ڈیپ ٹیک پلیٹ فارم ٹون ٹیگ نے بینکاری شعبے کے لیے اپنے نئے وائس فرسٹ بزنس اسسٹنٹ ای کوشا کی پیشکش کا اعلان کیا ہے۔ کمپنی کے مطابق یہ نئی ٹیکنالوجی بینکوں کو کسی اضافی بنیادی ڈھانچے میں سرمایہ کاری کیے بغیر براہ راست تاجروں کے کاؤنٹر پر مختلف مرچنٹ بینکاری خدمات فراہم کرنے کے قابل بنائے گی۔ بھارت کے 80 ملین سے زائد مائیکرو، اسمال اینڈ میڈیم انٹرپرائزز کو مدنظر رکھتے ہوئے تیار کیے گئے اس پلیٹ فارم میں کمپنی کی ملکیتی ایج اے آئی اور کانٹیکسچوئل انٹیلی جنس ٹیکنالوجی استعمال کی گئی ہے، جو ادائیگی، بینکاری اور مصنوعی ذہانت کو ایک ہی ڈیوائس میں یکجا کرتی ہے۔

کمپنی کے مطابق ای کوشا عام ادائیگی قبول کرنے والے آلات کو مکمل بینکاری ٹچ پوائنٹس میں تبدیل کر دیتا ہے، جس سے بینک اپنے روزمرہ کے کاروبار کے دوران تاجروں سے براہ راست رابطہ قائم کر سکتے ہیں۔ اس کے ذریعے بینک روایتی انفراسٹرکچر پر انحصار کم کرتے ہوئے ایک ہی ڈیوائس سے مختلف بینکاری خدمات فراہم کر سکیں گے، تاجروں کے ساتھ مسلسل رابطے میں رہیں گے اور نئی کراس سیلنگ کے مواقع بھی حاصل کریں گے۔

یہ ڈیوائس یو پی آئی، یو پی آئی 123 پے اور سینٹرل بینک ڈیجیٹل کرنسی کی ادائیگی قبول کرنے کی صلاحیت رکھتی ہے۔ تاجر اپنی پسندیدہ زبان میں صرف صوتی گفتگو کے ذریعے بینکاری خدمات حاصل کر سکیں گے۔ انہیں کسی موبائل ایپ کو ڈاؤن لوڈ کرنے کی ضرورت نہیں ہوگی بلکہ وہ فوری طور پر بینکاری سہولیات، ذاتی نوعیت کے قرض، کریڈٹ سہولیات، سرکاری اسکیموں اور ان کے فوائد، مختلف برانڈز سے براہ راست رابطے اور کاروباری معلومات تک رسائی حاصل کر سکیں گے۔

ٹون ٹیگ کا کہنا ہے کہ ای کوشا بینکوں کو تاجروں کے ساتھ مسلسل رابطے میں رہنے، بہتر خدمات فراہم کرنے، زیادہ محفوظ کریڈٹ فیصلے لینے اور قرضوں کی تقسیم کے عمل کو تیز کرنے میں مدد دے گا۔ یہ نظام کمپنی کے اسمال ایکشن لینگویج ماڈل پر مبنی ہے، جو مختلف بھارتی زبانوں میں قدرتی انداز میں صوتی گفتگو ممکن بناتا ہے۔

کمپنی کے مطابق یہ ڈیوائس ہر درخواست کو کلاؤڈ پر بھیجنے کے بجائے اپنی ملکیتی اینالاگ ایج کمپیوٹ ٹیکنالوجی کے ذریعے مقامی سطح پر مصنوعی ذہانت کا استعمال کرتی ہے، جس سے کمزور انٹرنیٹ کنیکٹیویٹی والے علاقوں میں بھی فوری صوتی خدمات فراہم کی جا سکتی ہیں۔ اس طریقۂ کار سے توانائی کی کھپت بھی کم ہوتی ہے اور روایتی کلاؤڈ بیسڈ نظام کے مقابلے میں اخراجات میں بھی نمایاں کمی آتی ہے۔

ٹون ٹیگ نے بتایا کہ آواز کی لہروں کے ذریعے محفوظ ڈیٹا منتقل کرنے کے شعبے میں ایک دہائی سے زائد تجربے کی بنیاد پر یہ اینالاگ ایج کمپیوٹ ٹیکنالوجی تیار کی گئی ہے، جس سے کم نیٹ ورک والے علاقوں میں بھی قابل اعتماد وائس بیسڈ بینکاری ممکن ہو سکے گی اور مرچنٹ بینکاری میں ایج اے آئی کے اگلے مرحلے کی بنیاد مضبوط ہوگی۔ کمپنی کے مطابق ای کوشا کو براہ راست بینکوں کے ذریعے نافذ کیا جائے گا، اس لیے تاجروں کو نہ کسی نئی ایپ کی ضرورت ہوگی، نہ ڈیجیٹل مہارت سیکھنی پڑے گی اور نہ ہی اپنے موجودہ طریقۂ کار میں کوئی تبدیلی کرنی ہوگی۔ یہ موجودہ بینکاری نظام کا توسیعی حصہ بن کر روزمرہ کی بینکاری خدمات کو زیادہ آسان اور تیز بنائے گا۔

ٹون ٹیگ کا دعویٰ ہے کہ ای کوشا استعمال کرنے والے بینک مرچنٹ سروسز کی لاگت میں 60 فیصد تک کمی لا سکتے ہیں، تاجروں کی وفاداری میں اضافہ کر سکتے ہیں، قرضوں کی تقسیم کے عمل کو تیز بنا سکتے ہیں، ہر تاجر کے ساتھ کراس سیلنگ کے مواقع کو دوگنا کر سکتے ہیں اور صارفین کے چھوڑ کر جانے کی شرح کو 15 سے 20 فیصد سے کم کر کے 6 سے 9 فیصد تک لا سکتے ہیں۔ کمپنی کے مطابق اس سے طویل مدت میں بینکوں اور تاجروں کے درمیان تعلقات مزید مضبوط ہوں گے اور کاروباری ترقی کے نئے مواقع پیدا ہوں گے۔

ہندوستھان سماچار

--------------------

ہندوستان سماچار / جاوید این اے