نئی دہلی، 13 جولائی (ہ س): سپریم کورٹ نے تمل ناڈو میں گائے ذبح کرنے پر مکمل پابندی لگانے کے مدراس ہائی کورٹ کے حکم پر روک لگا دی ہے۔ جسٹس وکرم ناتھ کی سربراہی والی بنچ نے مدراس ہائی کورٹ کے فیصلے پر روک لگانے کا حکم دیا۔
مدراس ہائی کورٹ نے 27 مئی کو گائے کے ذبیحے پر مکمل پابندی کا حکم دیا تھا۔ عرضی گزار اور ہندو مکل کاچی کے جنرل سکریٹری کے سوریہ پرشانت نے ہائی کورٹ میں ایک عرضی دائر کی تھی جس میں ایک مقررہ جگہ پر ذبح کرنے سے متعلق ہدایت طلب کی گئی تھی، لیکن ہائی کورٹ نے کسی بھی وقت اور کہیں بھی گائے یا بچھڑے کے ذبیحے پر مکمل پابندی لگا دی تھی۔ تمل ناڈو حکومت نے ریاست میں گائے ذبح کرنے پر مکمل پابندی لگانے کے مدراس ہائی کورٹ کے فیصلے کو چیلنج کرتے ہوئے سپریم کورٹ میں عرضی دائر کی تھی۔ تمل ناڈو حکومت نے کہا کہ ہائی کورٹ کا حکم تمل ناڈو اینیمل پریزرویشن ایکٹ کی دفعات کی خلاف ورزی ہے۔
عرضی میں کہا گیا تھا کہ تمل ناڈو اینیمل پریزرویشن ایکٹ 10 سال سے زیادہ عمر کی گایوں کو ذبح کرنے کی منظوری دیتا ہے، جو کام کرنے یا افزائش کے لیے نااہل ہیں۔ عرضی میں کہا گیا ہے کہ تمل ناڈو اینیمل پریزرویشن ایکٹ کے علاوہ، پریوینشن آف کرویلٹی ٹو اینیملز ایکٹ، پریوینشن آف کرویلٹی ٹو اینیملز (سلاٹر ہاؤس) رولز، تمل ناڈو اربن لوکل باڈیز ایکٹ اور تمل ناڈو اربن لوکل باڈیز رولز کی دفعات بھی جانوروں کو ذبح کرنے کے لیے شرائط طے کرتی ہیں، لیکن ان کو ذبح کرنے پر کوئی مکمل ممانعت نہیں ہے۔ ہائی کورٹ نے گائے ذبح کرنے پر مکمل پابندی لگا کر ان دفعات کی خلاف ورزی کی ہے۔
ہندوستھان سماچار
--------
ہندوستان سماچار / عبدالواحد
