گاندھی نگر، 13 جولائی ( ہ س ) : نیشنل فارنسک سائنسز یونیورسٹی (این ایف ایس یو)، گاندھی نگر، گجرات میں پیر کو منعقد ہونے والی انٹرپول ڈیجیٹل فارنسک ایکسپرٹ گروپ (ڈی ایف ای جی) کی 11 ویں میٹنگ کی افتتاحی تقریب سمیت کئی پروگرام قومی سوگ کی وجہ سے ملتوی کردئے گئے ہیں۔
سرکاری معلومات کے مطابق حکومت ہند نے قطر کے سابق امیر شیخ حمد بن خلیفہ آل ثانی کی وفات پر 13 جولائی کو ایک دن کے قومی سوگ کا اعلان کیا ہے۔ اس کی وجہ سے مرکزی وزیر داخلہ امت شاہ کی موجودگی میں ہونے والے کئی پروگرام اور لانچ کی تقریبات ملتوی کر دی گئی ہیں۔ تقریب کی نئی تاریخ کا اعلان بعد میں کیا جائے گا۔
اس سلسلے میں میڈیا کے نمائندوں سے درخواست کی گئی ہے کہ وہ پیر کو این ایف ایس یو، گاندھی نگر نہ پہنچیں۔ پروگرام کے دوران مرکزی وزیر داخلہ امت شاہ، گجرات کے وزیر اعلی بھوپیندر پٹیل اور وزیر مملکت برائے داخلہ ہرش سنگھوی کی موجودگی میں پانچ اہم پروجیکٹوں کا افتتاح کرنے کی تجویز پیش کی گئی۔ ان میں مالیاتی جرائم کی تحقیقات، میڈیا فارنسک اور کرائم سین مینجمنٹ سے متعلق جدید ترین مراکز شامل ہیں، جن میں 'میک ان انڈیا' کے تحت تیار کردہ ایشیا کی پہلی سائبر فارنسک انویسٹی گیشن وین بھی شامل ہے۔
قابل ذکر ہے کہ قطر کے سابق امیر شیخ حمد بن خلیفہ آل ثانی 12 جولائی کو 74 سال کی عمر میں انتقال کر گئے۔ انہوں نے 1995 سے 2013 تک قطر کے امیر کے طور پر حکومت کی۔
ہندوستھان سماچار
--------
ہندوستان سماچار / عبدالواحد
