بھوپال، 12 جولائی (ہ س)۔

’چھاتروں کی گونج‘ مہم کے تحت اتوار کے روز راجدھانی بھوپال میں واقع سندھو بھون میں ’قبائلی جین زی فیسٹ‘ کا انعقاد کیا گیا۔ پروگرام میں مدھیہ پردیش کے مختلف اضلاع سے آئے قبائلی ثقافتی گروپوں نے روایتی لوک رقص اور ثقافتی پروگراموں سے اپنی فن کاری اور وراثت کا مظاہرہ کیا۔ مہاراشٹر کی قبائلی ریپر ماہی جی کی پیشکش پروگرام کا خاص مرکز رہی، جس میں بڑی تعداد میں نوجوانوں نے جوش و خروش کے ساتھ شرکت کی۔

پروگرام سے خطاب کرتے ہوئے کانگریس ورکنگ کمیٹی (سی ڈبلیو سی) کی رکن اور تلنگانہ کانگریس کی انچارج میناکشی نٹراجن نے کہا کہ ’چھاتروں کی گونج‘ مہم طلبا اور نوجوانوں کی امنگوں کو آواز دینے کا ایک اسٹیج ہے۔ انہوں نے قبائلی نوجوانوں کی صلاحیت، ثقافت اور قیادت کی صلاحیتوں کو آگے بڑھانے کی ضرورت پر زور دیا۔

مدھیہ پردیش کانگریس کمیٹی کے صدر جیتو پٹواری نے کہا کہ ملک کے نوجوان تعلیم، روزگار اور مواقع سے جڑے کئی مسائل کا سامنا کر رہے ہیں۔ انہوں نے کہا کہ کانگریس طلبا اور نوجوانوں کے مفادات سے جڑے مسائل کو ترجیحی بنیادوں پر اٹھانے کے لیے پرعزم ہے۔

اسمبلی میں حزبِ اختلاف رہنما امنگ سنگھار نے کہا کہ قبائلی معاشرے کی ثقافت اور وراثت ملک کا ایک اہم اثاثہ ہے۔ انہوں نے نوجوانوں کو معیاری تعلیم اور مساوی مواقع فراہم کرنے کی ضرورت پر زور دیا، تاکہ وہ معاشرے اور ملک کی تعمیر میں مؤثر کردار ادا کر سکیں۔

آل انڈیا قبائلی کانگریس کے قومی صدر وکرانت بھوریا نے کہا کہ قبائلی نوجوان روایات کے تحفظ کے ساتھ ساتھ ملک کی ترقی اور قیادت میں بھی اہم کردار ادا کر رہے ہیں۔ ان کے مطابق، ’چھاتروں کی گونج‘ جیسی مہمات نوجوانوں کو اپنی بات رکھنے اور سماجی شراکت داری بڑھانے کا موقع فراہم کرتی ہیں۔

مہم کے کوآرڈینیٹر اور اے آئی سی سی کوآرڈینیٹر ڈاکٹر انشل ترویدی نے کہا کہ مہم کا مقصد قبائلیوں سمیت معاشرے کے تمام طبقات کے نوجوانوں کی صلاحیتوں، ثقافت اور خیالات کو ایک وسیع اسٹیج فراہم کرنا اور انہیں قومی دھارے سے جوڑنا ہے۔

پروگرام کے اختتام پر این ایس یو آئی کے ریاستی صدر آشوتوش چوکسی نے شکریہ ادا کرتے ہوئے کہا کہ ’چھاتروں کی گونج‘ مہم کو ریاست کے مختلف اضلاع اور تعلیمی اداروں تک وسعت دی جائے گی۔

اس موقع پر سابق وزیر پی سی شرما، رکن اسمبلی عارف مسعود، قبائلی کانگریس کے ریاستی صدر رامو ٹیکام، قبائلی کانگریس اور این ایس یو آئی کے عہدیداران، کارکنان اور بڑی تعداد میں طلبا اور نوجوان موجود تھے۔

ہندوستھان سماچار

---------------

ہندوستان سماچار / انظر حسن