نئی دہلی، 12 جولائی (ہ س) نیشنل رائفل ایسوسی ایشن آف انڈیا (این آر اے آئی) نے آئی ایس ایس ایف ورلڈ کپ ہانگژو (چین) اور ایشین گیمز 2026 آئیچی ناگویا (جاپان) کی تیاری کے لیے اتوار سے ایک ایلیٹ نیشنل شوٹنگ کیمپ شروع کیا ہے۔ اعلی کارکردگی کا کیمپ 20 جولائی تک جاری رہے گا، جس میں ملک کے ٹاپ شوٹر رائفل، پستول اور شاٹگن کے مقابلوں میں حصہ لیں گے۔

اس کیمپ میں ہندوستان کے بہت سے اسٹار شوٹر شرکت کر رہے ہیں، جن میں منو بھاکر، رودرانکش بالا صاحب پاٹل، ایشوری پرتاپ سنگھ تومر، ایلونیل والاریوان، ایشا سنگھ اور بھوونیش میندیرتا جیسے بڑے نام شامل ہیں۔ ان کھلاڑیوں کو بین الاقوامی سطح کے ماہر کوچوں کے تحت تربیت دی جائے گی۔

کوچنگ عملے میں اولمپک چیمپئن پیٹر ولسن (ٹریپ)، تھامس فرنک (رائفل)، جلینا ارونوویچ (پستول) اور ریکارڈو فلیپیلی (اسکیٹ) جیسے غیر ملکی ماہرین شامل ہیں۔ ان کے ساتھ ہندوستان کے لیجنڈری سابق شوٹر اور کوچ سماریش جنگ، انور سلطان، منوج کمار، ڈی ایس چندیل، پوجا گھاٹکر، ہرپریت سنگھ، یوگندر پال سنگھ، جودھ پوربیر سنگھ اور نلنجنا گھوشل بھی کھلاڑیوں کو تربیت دیں گے۔

این آر اے آئی کے صدر کالیکیش نارائن سنگھ دیو نے کہا کہ آنے والے چند مہینے ہندوستانی شوٹنگ کے لیے اہم ہیں۔ ہانگژو ورلڈ کپ اور ایشین گیمز ہمارے لیے بڑے اہداف ہیں۔ کیمپ کا مقصد کھلاڑیوں کو صحیح وقت پر بہترین کارکردگی کے لیے تیار کرنا ہے۔ تجربہ کار ہندوستانی اور غیر ملکی کوچوں کی رہنمائی میں کھلاڑیوں کو تکنیکی طور پر زیادہ مضبوط بنایا جائے گا تاکہ وہ پورے اعتماد کے ساتھ بین الاقوامی مقابلوں میں حصہ لے سکیں۔

این آر اے آئی کے سکریٹری جنرل پون کمار سنگھ نے کہا کہ قومی کیمپ کا مقصد کھلاڑیوں کے درمیان ہم آہنگی کو بڑھانا اور انہیں بہترین تربیتی ماحول فراہم کرنا ہے۔ ہم اس بات کو یقینی بنانے کی کوشش کر رہے ہیں کہ کھلاڑیوں کو کسی قسم کی پریشانی کا سامنا نہ کرنا پڑے اور پوری توجہ اپنی کارکردگی پر مرکوز رہے۔ کھلاڑیوں اور کوچنگ عملے کا جوش و خروش شاندار ہے اور ہمیں یقین ہے کہ یہ تیاری بین الاقوامی سطح پر بہترین نتائج دے گی۔

کیمپ کے دوران کھلاڑیوں کو اسپورٹس سائنس، فٹنس، انجری کی روک تھام اور ذہنی سختی کی خصوصی تربیت بھی دی جائے گی۔ ہائی پرفارمنس ڈائریکٹر ڈاکٹر پیئر بیوچیمپ، ہائی پرفارمنس منیجر رونک پنڈت اور 11 رکنی اسپورٹس سائنس ٹیم کھلاڑیوں کے ساتھ کام کریں گے۔

رائفل اور پستول کی کلاسوں کی تربیت 12 سے 17 جولائی تک، ٹریپ کلاسز 14 سے 20 جولائی تک، جبکہا سکیٹ ٹیم کے لیے خصوصی تربیت 9 جولائی سے شروع ہوئی ہے۔ این آر اے آئی کو امید ہے کہ یہ کیمپ ہندوستانی شوٹروں کو ورلڈ کپ اور ایشین گیمز میں تمغے جیتنے کے لیے ایک مضبوط بنیاد فراہم کرے گا۔

---------------

ہندوستان سماچار / عبدالسلام صدیقی