نئی دہلی، 10جولائی(ہ س)۔

عام آمی پارٹی کے قومی کنوینر اروند کیجریوال نے رام مندر میں مبینہ ڈکیتی کرنے والے افراد کو سزا دلانے کے لیے اتوار کے روز سندرکانڈ پاٹھ کے انعقاد اور ملک گیر دستخطی مہم شروع کرنے کا اعلان کیا ہے۔ انہوں نے بتایا کہ اتوار کو صبح 10 بجے دہلی کے روہنی سیکٹر-10 واقع جے ایم ڈی ٹینٹ، جاپانی پارک میں سندرکانڈ پاٹھ کا اہتمام کیا جائے گا۔ اس کے بعد ہنومان جی کا آشیرواد حاصل کر کے پورے ملک میں دستخطی مہم چلائی جائے گی۔اروند کیجریوال نے کہا کہ گزشتہ چند ہفتوں کے واقعات سے ظاہر ہوتا ہے کہ مودی حکومت رام مندر میں مبینہ ڈکیتی کرنے والے مہاپاپیوں کو بچانے میں مصروف ہے، جبکہ سناتن دھرم کے ان مجرموں کو پھانسی کی سزا ملنی چاہیے تھی۔انہوں نے کہا کہ اب ہر سناتنی ہندو کا مذہبی فرض ہے کہ وہ ان مہاپاپیوں کو سزا دلانے کے لیے خود کو وقف کرے۔ جو لوگ ان افراد کو سزا دلانے کی کوشش کریں گے، بھگوان شری رام ان پر اور ان کے خاندان پر اپنی کرپا فرمائیں گے۔ اسی مقصد سے اس اتوار دہلی میں سندرکانڈ پاٹھ کا انعقاد کیا جا رہا ہے۔ انہوں نے تمام رام بھکتوں اور عقیدت مندوں سے اپیل کی کہ زیادہ سے زیادہ تعداد میں شریک ہوں۔ پاٹھ کے بعد اس بات پر غور کیا جائے گا کہ بھگوان شری رام کے مجرموں کو سزا دلانے کے لیے آئندہ کیا اقدامات کیے جائیں۔ دستخطی مہم کے تحت ایک خط پر رام بھکت دستخط کریں گے، جسے وزیر اعظم کو بھیجا جائے گا۔آپ ہیڈکوارٹر میں پریس کانفرنس سے خطاب کرتے ہوئے اروند کیجریوال نے کہا کہ گزشتہ چند دنوں کے واقعات یہ ظاہر کرتے ہیں کہ مودی حکومت اوپر سے نیچے تک ان لوگوں کو بچانے کی پوری کوشش کر رہی ہے جنہوں نے شری رام چندر جی کے گھر میں مبینہ چوری اور ڈکیتی کا مہاپاپ کیا۔ انہوں نے الزام لگایا کہ رام مندر سے متعلق زمینوں میں بڑے پیمانے پر گھوٹالے ہوئے، جن کے تمام دستاویزات موجود ہیں۔ ان کے مطابق دو کروڑ روپے کی زمین ٹرسٹ نے اٹھارہ کروڑ روپے میں خریدی، مگر تمام ثبوت ہونے کے باوجود نہ کوئی جانچ ہو رہی ہے، نہ ایف آئی آر درج کی جا رہی ہے اور نہ ہی کسی کو گرفتار کیا جا رہا ہے۔

کیجریوال نے مزید کہا کہ تعمیراتی کاموں کے ٹھیکے کن کمپنیوں کو دیے گئے، اس پر بھی کھلے عام الزامات لگ رہے ہیں۔ متعلقہ انجینئروں کا کہنا ہے کہ تعمیراتی کاموں میں 40 فیصد کمیشن طلب کیا جاتا تھا، لیکن اس کی بھی کوئی تحقیقات نہیں ہو رہیں۔ اسی طرح چندے کی مبینہ بڑے پیمانے پر چوری ہوئی، سی سی ٹی وی میں متعدد واقعات ریکارڈ ہوئے، مگر ان کی بھی کوئی جانچ نہیں کی جا رہی۔انہوں نے کہا کہ صرف آٹھ چھوٹے ملازمین کو گرفتار کر کے جیل بھیجا گیا ہے، جبکہ بڑے لوگوں کو بچانے کی کوشش کی جا رہی ہے۔ ایسے حالات میں اب عوام کو آواز اٹھانی ہوگی اور بھگوان کی پناہ میں جانا ہوگا۔ اسی لیے 12 جولائی، اتوار، صبح 10 بجے جے ایم ڈی ٹینٹ، جاپانی پارک، سیکٹر-10، روہنی میں سندرکانڈ پاٹھ کا انعقاد کیا جا رہا ہے۔

ہندوستھان سماچار

ہندوستان سماچار / Md Owais Owais