بالی ووڈ کے مسٹر پرفیکشنسٹ عامر خان ایک بار پھر اپنی نجی زندگی کے حوالے سے خبروں کی زینت بن گئے ہیں۔ رپورٹس اور ذرائع کے حوالے سے دعویٰ کیا جا رہا ہے کہ عامر خان اپنی قریبی دوست گوری اسپریٹ کے ساتھ آئندہ 5 جولائی کو تیسری شادی کے بندھن میں بندھ سکتے ہیں۔ تاہم، اس حوالے سے ابھی تک کوئی باضابطہ اعلان نہیں کیا گیا، لیکن دونوں کی شادی کی خبروں نے شوبز حلقوں میں کافی چہل پہل پیدا کر دی ہے۔
بتایا جا رہا ہے کہ عامر اور گوری گزشتہ تقریباً ایک سال سے ساتھ ہیں اور اپنے تعلق کو اگلے مرحلے تک لے جانے کا فیصلہ کر چکے ہیں۔ ذرائع کے مطابق دونوں ایک سادہ اور نجی تقریب میں شادی کرنا چاہتے ہیں۔ امکان ہے کہ شادی کی تقریب ان کے گھر پر منعقد ہو، جس میں صرف خاندان کے افراد اور قریبی دوستوں کو مدعو کیا جائے گا۔ عامر خان نے گزشتہ سال اپنی 60ویں سالگرہ کے موقع پر پہلی بار عوامی طور پر گوری اسپریٹ کا تعارف کروایا تھا۔ اس کے بعد سے دونوں کئی مواقع پر ایک ساتھ نظر آ چکے ہیں۔ کہا جا رہا ہے کہ دونوں ایک دوسرے کے ساتھ وقت گزارنے کے ساتھ ساتھ اپنے رشتے کو مزید مضبوط بنانے پر توجہ دے رہے ہیں اور زندگی کے ایک نئے باب کا آغاز کرنے کے لیے تیار ہیں۔
واضح رہے کہ عامر خان اس سے قبل دو شادیاں کر چکے ہیں۔ عامر کی پہلی شادی رینا دتہ سے ہوئی تھی اور دونوں سال 2002 میں الگ ہو گئے تھے۔ اس کے بعد سال 2005 میں عامر نے کرن راؤ سے دوسری شادی کی، اور 2021 میں دونوں کی علیحدگی ہو گئی۔ اس کے باوجود دونوں سابقہ بیویوں کے ساتھ ان کے تعلقات آج بھی خوشگوار اور دوستانہ ہیں۔
ایسے میں گوری اسپریٹ کے ساتھ ان کا یہ رشتہ پختگی، احترام اور باہمی سمجھ بوجھ پر مبنی سمجھا جا رہا ہے۔ اگر شادی کی یہ خبریں درست ثابت ہوتی ہیں تو یہ عامر خان کی زندگی کا ایک نیا اور اہم موڑ ہوگا۔
ہندوستھان سماچار
---------------
ہندوستان سماچار / عبدالواحد
