تالہ نگری کو ملے گی نئی شناخت، 2.99 کروڑ روپے کی لاگت سے ’’ویلکم ٹوعلی گڑھ‘‘ گیٹ اور خوبصورتی سازی منصوبے کا سنگِ بنیاد

علی گڑھ، 27 جون (ہ س)۔

شہر کی صنعتی شناخت تالہ نگری کو جدید اور پرکشش شکل دینے کی جانب ایک اہم قدم اٹھاتے ہوئے میئر پرشانت سنگھل اور میونسپل کمشنر پریم پرکاش مینا نے ہفتہ کے روز تقریباً 2.99 کروڑ روپے کی لاگت سے تعمیر ہونے والے ویلکم ٹو علی گڑھ تھیم پر مبنی عظیم الشان داخلی دروازے اور خوبصورتی سازی منصوبے کا سنگِ بنیاد رکھا۔

سنگِ بنیاد کی تقریب روایتی پوجا کے ساتھ منعقد ہوئی۔ اس موقع پر میئر اور میونسپل کمشنر نے کہا کہ اتر پردیش کے وزیر اعلیٰ یوگی آدتیہ ناتھ کی رہنمائی میں شہری علاقوں کی ترقی اور خوبصورتی کے لیے مسلسل کام کیا جا رہا ہے، جس کے تحت رام گھاٹ روڈ پر واقع تالا نگری صنعتی علاقے کے داخلی حصے کو جدید شہری معیار کے مطابق ترقی دی جائے گی۔

میونسپل کمشنر پریم پرکاش مینا نے بتایا کہ منصوبے کے تحت ایک شاندار اور دیدہ زیب ویلکم ٹو علی گڑھ گیٹ تعمیر کیا جائے گا، جس کے ساتھ گرین بیلٹ، وسیع شجرکاری، سیلفی پوائنٹ، جدید روشنی کا نظام، آرٹسٹک پینٹنگ، عوامی سہولیات اور جدید لینڈ اسکیپنگ بھی کی جائے گی، تاکہ شہر میں داخل ہونے والے افراد کو علی گڑھ کی منفرد شناخت اور ثقافتی وراثت کا خوبصورت منظر پیش کیا جا سکے۔

انہوں نے بتایا کہ یہ عظیم الشان داخلی دروازہ رام گھاٹ روڈ پر امر اجالا ہیڈ آفس کے سامنے تعمیر کیا جائے گا اور منصوبہ آئندہ تین ماہ میں مکمل کرنے کا ہدف مقرر کیا گیا ہے۔

میئر پرشانت سنگھل نے کہا کہ اس منصوبے کا مقصد صرف ایک داخلی دروازہ تعمیر کرنا نہیں بلکہ علی گڑھ کی صنعتی اہمیت، ثقافتی وراثت اور جدید شہری تشخص کو اجاگر کرنا ہے، تاکہ شہر میں داخل ہوتے ہی زائرین کو ایک خوبصورت، صاف ستھرا اور ترقی یافتہ علی گڑھ نظر آئے۔

شہری حلقوں کا ماننا ہے کہ اس منصوبے کی تکمیل کے بعد رام گھاٹ روڈ پر واقع تالا نگری کا داخلی علاقہ نہ صرف جدید طرز پر آراستہ ہوگا بلکہ یہ علی گڑھ کی نئی شناخت اور شہر کی خوبصورتی میں بھی نمایاں اضافہ کرے گا۔

ہندوستھان سماچار

ہندوستان سماچار / سید کامران علی گڑھ