فیفا ورلڈ کپ 2026 : اسپین نے یوروگوئے کو 0-1 سے ہرا کر گروپ ایچ میں ٹاپ پوزیشن حاصل کی

۔ یوروگوئے فیفا ورلڈ کپ 2026 سے باہر ہو گیا

گواڈلاہارا، 27 جون (ہ س)۔ اسپین نے فیفا ورلڈ کپ 2026 کے گروپ ایچ کے اپنے آخری مقابلے میں ہفتہ کی علی الصبح یوروگوئے کو 0-1 سے ہرا کر گروپ میں ٹاپ پوزیشن حاصل کی اور ناک آوٹ مرحلے میں قدم رکھ دیا۔ اس شکست کے ساتھ مارسیلو بیلسا کی ٹیم یوروگوئے کا ورلڈ کپ کا سفر گروپ مرحلے میں ہی ختم ہو گیا، جبکہ کیپ ورڈے نے بھی آخری-32 میں جگہ بنا لی۔

اسپین کے لیے میچ کا واحد گول ایلکس بائینا نے پہلے ہاف کے 42 ویں منٹ میں کیا۔ مارکوس لورینٹے کے کراس پر بائینا نے گیند کو کنٹرول کر کے شاٹ لگایا، جسے یوروگوئے کے تجربہ کار گول کیپر فرنانڈو مسلیراروکنے میں ناکام رہے اور گیند ان کے ہاتھوں سے نکل کر گول میں چلی گئی۔ میچ کے آغاز میں اسپین کو برتری حاصل کرنے کا موقع ملا تھا، لیکن میکل اویارزابال کی کوشش کو یوروگوئے کی دفاعی لائن نے ناکام بنا دیا۔ دوسری طرف یوروگوئے بھی جارحانہ موڈ میں نظر آیا، لیکن ڈارون نونیز اور روڈریگو بینٹانکمر اپنے مواقع کا فائدہ نہیں اٹھا سکے۔

ہاف ٹائم کے بعد مسلیرا کی جگہ سرجیو روشیٹ کو میدان میں اتارا گیا۔ اس کے باوجود یوروگوئے برابری کا گول نہیں کر سکا۔ اسپین کے دانی اولمو اور فیران ٹوریس نے برتری کو دوگنا کرنے کے مواقع بنائے، لیکن ایک کوشش کراس بار سے ٹکرا گئی۔ انجری ٹائم میں یوروگوئے کی مشکلات اس وقت اور بڑھ گئیں جب اگسٹن کانوبیو کو پاو کوبارسی پر خطرناک ٹیکل کی وجہ سے سیدھا ریڈ کارڈ دکھایا گیا۔ اس کے بعد اسپین نے آسانی سے میچ ختم کیا۔

اس جیت کے ساتھ اسپین گروپ ایچ میں ٹاپ پر رہا اور اب 2 جولائی کو گروپ جے کی رنر اپ ٹیم سے آخری-32 کا مقابلہ کھیلے گا۔ فی الحال گروپ جے میں آسٹریا دوسرے نمبر پر ہے۔ دوسری طرف، کیپ ورڈے اور سعودی عرب کے درمیان مقابلہ بغیر کسی گول کے برابری پر ختم ہونے سے کیپ ورڈے دوسرے نمبر پر رہتے ہوئے پہلی بار ورلڈ کپ کے ناک آوٹ مرحلے میں پہنچ گیا۔

مختصر اسکور:

اسپین 0-1 یوروگوئے

گول: ایلکس بائینا (42')

ریڈ کارڈ: اگسٹن کانوبیو (یوروگوئے، انجری ٹائم)۔

ہندوستھان سماچار

---------------

ہندوستان سماچار / انظر حسن