کالی ندی پر نئے پل کی تعمیر ضابطوں کی زد میں، خصوصی اجازت کے بغیر منصوبہ ممکن نہیں

علی گڑھ, 25 جون (ہ س)۔ عالم پور کائستھان اور سیکرنا کے درمیان کالی ندی پر مجوزہ پل کی تعمیر تکنیکی ضابطوں کی وجہ سے رکاوٹ کا شکار ہو گئی ہے۔ محکمہ کے مطابق اس مقام پر تقریباً 120 میٹر طویل پل کی ضرورت ہے، تاہم موجودہ قواعد کے تحت اس منصوبے کے لیے خصوصی رعایت درکار ہوگی۔ محکمہ کے افسران نے بتایا کہ مجوزہ مقام سے تقریباً ڈیڑھ کلومیٹر دور رائے پور گاؤں کے قریب کالی ندی پر پہلے سے ایک پختہ پل موجود ہے، جبکہ سیکرنا کے نزدیک تقریباً 1.20 کلومیٹر فاصلے پر ایک رپٹا پل اور گودھا روڈ پر تقریباً 4 کلومیٹر دور ایک اور پختہ پل تعمیر شدہ ہے۔

محکمہ تعمیرات عامہ کے ضابطوں کے مطابق 60 سے 200 میٹر لمبے نئے دریا کے پل کی منظوری کے لیے مجوزہ مقام کے اپ اسٹریم اور ڈاؤن اسٹریم دونوں جانب پہلے سے موجود پلوں کے درمیان کم از کم 6 کلومیٹر کا فاصلہ ہونا ضروری ہے۔ چونکہ اس مقام کے قریب پہلے ہی کئی پل موجود ہیں، اس لیے نئے پل کی تعمیر کے لیے قواعد میں نرمی اور خصوصی اجازت لازمی ہوگی۔

افسران کے مطابق منصوبے پر عمل درآمد مالی وسائل کی دستیابی پر بھی منحصر ہے، لہٰذا حکومت سے خصوصی منظوری اور مالی منظوری حاصل ہونے کے بعد ہی تعمیراتی کام آگے بڑھ سکے گا۔ علاقے کے دیہی باشندے طویل عرصے سے کالی ندی پر پل کی تعمیر کا مطالبہ کر رہے ہیں کیونکہ دونوں جانب زرعی اراضی ہونے کی وجہ سے کسانوں اور مقامی لوگوں کو آمد و رفت میں شدید دشواری کا سامنا کرنا پڑتا ہے۔

ہندوستھان سماچار

---------------

ہندوستان سماچار / سید کامران علی گڑھ