نئی دہلی، 24 جون (ہ س)۔ بھارتی ٹیلی کمیونی کیشن ریگولیٹری اتھارٹی (ٹی آر اے آئی) نے راجستھان کے منوہرپور سے دوسا قومی شاہراہ (این ایچ-148) پر موبائل نیٹ ورک کے معیار کا آزادانہ ڈرائیو ٹیسٹ (آئی ڈی ٹی) رپورٹ جاری کی ہے۔ رپورٹ کے مطابق ڈیٹا ڈاؤن لوڈ رفتار کے معاملے میں ریلائنس جیو سب سے آگے رہی، جبکہ بی ایس این ایل کی کارکردگی سب سے کمزور پائی گئی۔
ٹی آر اے آئی نے بتایا کہ یہ ڈرائیو ٹیسٹ 2 مئی کو راجستھان لائسنس یافتہ سروس ایریا میں منوہرپور سے دوسا کے درمیان 62.2 کلومیٹر طویل راستے پر کیا گیا۔ اس کا مقصد مختلف ٹیلی کمیونی کیشن سروس فراہم کنندگان کی جانب سے دی جانے والی آواز اور ڈیٹا خدمات کی حقیقی صورتحال کا جائزہ لینا تھا۔
رپورٹ کے مطابق اوسط ڈیٹا ڈاؤن لوڈ رفتار ریلائنس جیو کے لیے 247.01 ایم بی پی ایس ریکارڈ کی گئی، جبکہ ایئرٹیل کی 102.80 ایم بی پی ایس، ووڈافون آئیڈیا (وی آئی) کی 35.97 ایم بی پی ایس اور بی ایس این ایل کی صرف 3.99 ایم بی پی ایس رہی۔
ڈیٹا اپ لوڈ رفتار میں ایئرٹیل 20.93 ایم بی پی ایس کے ساتھ سب سے آگے رہی۔ جیو کی اپ لوڈ رفتار 19.14 ایم بی پی ایس، وی آئی کی 17.25 ایم بی پی ایس اور بی ایس این ایل کی 1.88 ایم بی پی ایس ریکارڈ کی گئی۔
کوریج گیپ کے معاملے میں بی ایس این ایل کی کارکردگی سب سے کمزور پائی گئی۔ ٹیسٹ کے دوران بی ایس این ایل کے 2,213 نمونوں میں سگنل مقررہ کم از کم سطح سے نیچے پایا گیا، جبکہ ایئرٹیل کے 217، جیو کے 189 اور وی آئی کے 420 نمونوں میں ایسا پایا گیا۔
کال ڈراپ کے معاملے میں ایئرٹیل کی کارکردگی بہتر رہی اور اس کے نیٹ ورک پر کوئی کال ڈراپ نہیں ہوا۔ جیو پر ایک، وی آئی پر دو اور بی ایس این ایل پر چھ کال ڈراپ ریکارڈ کیے گئے۔
ٹی آر اے آئی کے مطابق یہ ڈرائیو ٹیسٹ راستے لَکھیر، نیک والا، چِلپالی موڑ، بہلور، رائسر، پاوٹا، سنکوترا، آندھی، رامج پورہ اور جھیرا علاقوں سے گزرا۔ ٹیسٹ کے نتائج متعلقہ ٹیلی کمیونی کیشن سروس فراہم کنندگان کو ضروری اصلاحی کارروائی کے لیے بھیج دیے گئے ہیں۔
ہندوستھان سماچار
---------------
ہندوستان سماچار / عبدالواحد
