نئی دہلی، 24 جون (ہ س)۔ جسٹس بی وی ناگرتنا کی سربراہی میں سپریم کورٹ کی تعطیلاتی بنچ نے راجستھان ہائی کورٹ کے فیصلے کو چیلنج کرنے والی ایک عرضی کو خارج کر دیا، جس میں کہا گیا تھا کہ ای ڈبلیو ایس زمرے کے طلباءکو یہ فائدہ داخلہ کے وقت تک درست ہے اور وہ فیس میں مزید رعایت حاصل نہیں کر سکتے۔

یہ درخواست راجستھان کے ای ڈبلیو ایس کے طالب علم ہرش وردھن سنگھ نے دائر کی تھی۔ سماعت کے دوران جسٹس ناگارتنا نے کہا کہ نجی کالجوں سے سرکاری کالجوں کی طرح فیس میں رعایت کی توقع نہیں کی جا سکتی۔ پرائیویٹ کالجز کو خود فنڈز فراہم کرنا ہوتاہے۔ سرکاری کالجوں کو حکومت سے مراعات ملتی ہیں اور یہ کلیدی فرق ہے۔ ٹی ایم اے پائی کے فیصلے کا حوالہ دیتے ہوئے جسٹس ناگارتنا نے کہا کہ کیپٹیشن فیس پر پابندی لگا دی گئی ہے، اس کا مطلب یہ نہیں ہے کہ کالج کی عام فیس نہیں لی جائے گی۔

درخواست گزار نے دلیل دی کہ ای ڈبلیو ایس کی سالانہ آمدنی کی حد آٹھ لاکھ روپے تک ہے۔ آٹھ لاکھ روپے کی آمدنی والا ای ڈبلیو ایس طالب علم نجی میڈیکل کالج کی فیس کیسے ادا کر سکتا ہے؟ درخواست گزار نے نشاندہی کی کہ راجستھان میں نجی میڈیکل کالجوں کی فیس 18.9 لاکھ روپے سے لے کر 25 لاکھ روپے تک ہے۔ نتیجتاً، ایک ای ڈبلیو ایس طالب علم نجی میڈیکل کالج میں جانے کا متحمل کیسے ہو سکتا ہے؟ اس کے بعد عدالت نے انہیں اسکالرشپ یا سبسڈی حاصل کرنے کا مشورہ دیا۔

---------------

ہندوستان سماچار / عبدالسلام صدیقی