ایٹا نگر، 24 جون (ہ س)۔ اروناچل پردیش کے کیی پنیور ضلع کے پوسا میں واقع نارتھ ایسٹرن الیکٹرک پاور کارپوریشن لمیٹڈ (این ای ای پی سی او) پروجیکٹ کالونی کے آس پاس کے علاقوں میں کل رات سے بدھ کی صبح تک ہونے والی موسلادھار بارش اور سیلاب کی وجہ سے علاقہ مکمل طور پر تباہ ہوگیا۔

سیلاب کے تعلق سے اروناچل پردیش کے ڈیزاسٹر مینجمنٹ ڈپارٹمنٹ کی طرف سے فراہم کردہ معلومات کے مطابق، آج سہ پہر 3 بجے تک پانچ افراد لاپتہ ہیں۔ نیپکو کے پروجیکٹ ہیڈ کے مطابق پانچ افراد کے لاپتہ ہونے کی اطلاع ملی ہے۔ اس دوران کل 17 افراد زخمی ہوئے ہیں جن میں سے تین کی حالت تشویشناک بتائی جاتی ہے۔ تین شدید زخمیوں کو ایمبولینس کے ذریعے گراو¿نڈ زیرو لے جایا گیا ہے۔ پیٹا پل پر سڑک بند ہونے کی وجہ سے، تینوں زخمیوں کو ایمبولینس کے ذریعے آگے لے جانے سے پہلے پیدل سڑک کا بند حصہ عبور کرنا پڑا۔کیی پنیور ضلع کے پوسا، ہوج اور پوٹین علاقوں میں کئی مقامات پر بڑے پیمانے پر لینڈ سلائیڈنگ کی وجہ سے تقریباً پانچ دیگر اضلاع بھی مکمل طور پر منقطع ہو گئے ہیں۔ذرائع کے مطابق 23 اور 24 جون کی درمیانی شب مسلسل بارش کے باعث سیلابی ریلہ آگیا جس سے نیپکو پراجیکٹ کالونی اور یزالی سرکل کے نیچے نشیبی علاقے زیرآب آگئے۔ اس سے کالونی کے تقریباً 20 کوارٹرز کو نقصان پہنچا اور زیر تعمیر دیوار بہہ گئی۔ فور وہیلر سمیت متعدد گاڑیاں بھی متاثر ہوئیں۔کیی پنیور ضلع کے ڈپٹی کمشنر شویتا ناگرکوٹی مہتا کے مطابق لینڈ سلائیڈنگ نے یزالی اور ہوج پوٹین دونوں کو متاثر کیا۔ سڑکوں کی بندش سے متاثرہ علاقے تک رسائی مشکل ہو گئی ہے۔ پوٹین اور پوسا کے درمیان پھنسے ایک ماہر ارضیات ریسکیو کے منتظر ہیں۔ضلعی انتظامیہ کا کہنا ہے کہ ابتدائی طور پر ایک خاتون کے لاپتہ ہونے کی اطلاع ملی تھی، لیکن تازہ ترین اطلاعات کے مطابق پانچ افراد لاپتہ ہیں۔ حکام نے ابھی تک کسی جانی نقصان کی تصدیق نہیں کی ہے۔

امدادی کارروائیوں میں شدید مشکلات کا سامنا ہے کیونکہ نیپکو پراجیکٹ سائٹ پر ہیلی پیڈ کو نقصان پہنچا ہے اور سڑک کا رابطہ منقطع ہو گیا ہے۔ دیگر ضلعی اہلکار جائے وقوعہ تک پہنچنے میں ناکام رہے ہیں، جب کہ ضلع کے ڈپٹی کمشنر، پولیس اہلکار، اور اسٹیٹ ڈیزاسٹر رسپانس فورس (ایس ڈی آر ایف) کی ٹیمیں پیدل علاقے تک پہنچنے کی کوشش کر رہی ہیں۔

ہندوستھان سماچار

ہندوستان سماچار / Mohammad Khan