جالندھر، 20 جون (ہ س)۔ جالندھر کمشنریٹ پولیس نے جبری وصولی اور فائرنگ کے واقعات میں ملوث ایک بڑے گینگ کا پردہ فاش کرتے ہوئے اس کے چار سرگرم ارکان کو گرفتار کر لیا۔ پولیس نے ملزمین سے تین جدید پستول اور بھاری مقدار میں فعال کارتوس برآمد کئے ہیں ۔

ابتدائی تفتیش سے معلوم ہوا ہے کہ گرفتار ملزمان بیرون ملک مقیم جرائم پیشہ افراد سے براہ راست رابطے میں تھے اور ان کے کہنے پر وارداتیں کرتے تھے۔ پولیس کے مطابق ان گرفتاریوں نے پنجاب کے دو اضلاع میں ٹارگٹ کلنگ اور دہشت پھیلانے کی ایک بڑی سازش کو ناکام بنا دیا ہے۔

پولیس کو خفیہ اطلاع ملی کہ کچھ بدمعاش شہر میں کسی بڑی واردات کو انجام دینے کے ارادے سے گھوم رہے ہیں۔ پولیس ٹیم نے تیزی سے کارروائی کرتے ہوئے گینگ کے چار ارکان کو ان کے اسلحہ سمیت گرفتار کر لیا۔

دوران تفتیش انکشاف ہوا کہ ملزمان بیرون ملک مقیم اپنے ہینڈلرز کی ہدایت پر وارداتوں کو انجام دیتے تھے۔ ہینڈلرز انہیں انٹرنیٹ کالنگ اور سوشل میڈیا ایپس کے ذریعے اہداف اور مالی مدد فراہم کرتے تھے۔

پولیس حکام کے مطابق گرفتار ملزمان جالندھر اور شہید بھگت سنگھ نگر اضلاع میں شوٹنگ کی متعدد وارداتوں کی منصوبہ بندی اور انجام دینے میں ملوث تھے۔ اس گروہ کا بنیادی مقصد تاجروں اور بااثر افراد کو ڈرا دھمکا کر ان سے بڑی رقم ہتھیانا تھا۔

پولیس کے مطابق گینگ کے ارکان نے حال ہی میں دہشت پھیلانے کے مقصد سے کئی مقامات پر جاسوسی کی تھی۔ بروقت کارروائی سے ممکنہ بڑے واقعات کے ٹل جانے میں مد ملی ہے۔جالندھر کمشنریٹ کے بھارگو کیمپ تھانہ میں آئی پی سی کی متعلقہ دفعات کے تحت مقدمہ درج کیا گیا ہے۔ پولیس نے ملزمین کو ریمانڈ پر لے کر پورے نیٹ ورک سے پردہ اٹھانے کے لیے پوچھ گچھ شروع کر دی ہے۔

پولیس اس بات کی بھی تفتیش کر رہی ہے کہ ملزمان نے اسلحہ کیسے حاصل کیا اور انہیں مقامی مدد کس نے فراہم کی۔ گینگ کے ماضی اور موجودہ رابطوں کی تحقیقات کے لیے تکنیکی ٹیموں کو بھی استعمال کیا جا رہا ہے۔

ہندوستھان سماچار

ہندوستان سماچار / محمد شہزاد