نئی دہلی، 20 جون (ہ س)۔ مرکزی حکومت نے فکسڈ ڈوز کمبینیشن (ایف ڈی سی) والی 16 ادویات کی تیاری، فروخت اور تقسیم پر فوری طور پر پابندی عائد کر دی ہے۔ ان ادویات میں جلدی امراض، درد کم کرنے، تناؤ دور کرنے والی بعض دوائیں اور اینٹی بایوٹکس شامل ہیں۔

وزارتِ صحت و خاندانی بہبود نے ادویات و کاسمیٹکس ایکٹ 1940 کی دفعہ 26 اے کے تحت نوٹیفکیشن جاری کرتے ہوئے 16 ایف ڈی سی ادویات کی تیاری، فروخت اور انسانی استعمال کے لیے تقسیم پر پابندی لگا دی ہے۔ یہ نوٹیفکیشن فوری طور پر نافذ العمل ہو گئے ہیں۔

وزارت نے تمام ریاستی ڈرگ کنٹرولرز، ریگولیٹری اداروں اور نفاذی ایجنسیوں کو ہدایت دی ہے کہ وہ ان نوٹیفکیشنز پر سختی سے عمل درآمد اور ان کی پابندی کو یقینی بنائیں۔ مینوفیکچررز، درآمد کنندگان، تقسیم کاروں اور دیگر متعلقہ فریقوں کو بھی قانون کی دفعات پر عمل کرتے ہوئے ضروری اصلاحی اقدامات کرنے کا مشورہ دیا گیا ہے۔

ایف ڈی سی ایسی ادویات ہوتی ہیں جن میں دو یا دو سے زیادہ فعال دوائیں ایک ہی گولی یا کیپسول میں مقررہ تناسب کے ساتھ شامل کی جاتی ہیں۔ ان کا بنیادی مقصد علاج کو آسان بنانا، گولیوں کی تعداد کم کرنا اور مریض کے تعاون کو بہتر بنانا ہوتا ہے۔ یہ ادویات عموماً ان بیماریوں میں استعمال کی جاتی ہیں جن کے علاج کے لیے متعدد دواؤں کی ضرورت ہوتی ہے۔

پابندی عائد کردہ دوائیوں کے امتزاج درج ذیل ہیں:

ایسیٹائل سیلیسیلک ایسڈ، ایتھوہیپٹازین

ایلوویرا ایکسٹریکٹ، ایلانٹوئن، الفا ٹوکوفیرول ایسیٹیٹ، ڈی-پینتھینول، وٹامن اے

ایلوویرا ایکسٹریکٹ، وٹامن ای، ڈائیمتھیکون، گلیسرین

ایلوویرا، جوجوبا آئل، وٹامن ای

ایلوویرا، اورنج آئل

ایلوویرا، جوجوبا آئل، وہیٹ جرم آئل، ٹی ٹری آئل

ایلوویرا، وٹامن ای، ہربل مرکب

ڈائی سائیکلومائن، پیراسیٹامول، کلائیڈینیم برومائیڈ

ڈائی سائیکلومائن، پیراسیٹامول، کلائیڈینیم برومائیڈ، کلورڈائزیپوکسائیڈ

گلیکلازائڈ، کرومیم پیکولینیٹ

پیراسیٹامول، لگنوکین

اموکسی سلین، سیراٹیوپیپٹیڈیز، لیکٹوبیسیلس اسپوروجینس

اموکسی سلین، کلوکساسلین، لیکٹک ایسڈ بیسیلس، سیراٹیوپیپٹیڈیز

اموکسی سلین، سیراٹیوپیپٹیڈیز

سیفاڈروکسل، پروبینیسڈ

سیفیوروکسائم، سیراٹیوپیپٹیڈیز

سپریم کورٹ کی ہدایات کے بعد ڈرگ ٹیکنیکل ایڈوائزری بورڈ (ڈی ٹی اے بی) نے مختلف ایف ڈی سی ادویات کا جائزہ لینے کے لیے ایک ماہر کمیٹی تشکیل دی تھی۔ کمیٹی کا مقصد ایسی ایف ڈی سی ادویات کی نشاندہی کرنا تھا جو غیر معقول، طبی جواز سے محروم یا انسانی صحت کے لیے نقصان دہ ہوں۔

سائنسی جائزے اور ماہر کمیٹی کی سفارشات کی بنیاد پر حکومت نے ایسی 16 ایف ڈی سی ادویات کے خلاف کارروائی کرتے ہوئے ان پر پابندی عائد کی ہے۔

ہندوستھان سماچار

---------------

ہندوستان سماچار / عبدالواحد