نئی دہلی، 20 جون (ہ س):۔

انفورسمنٹ ڈائریکٹوریٹ (ای ڈی) نے 5,978 کروڑ روپے سے زیادہ کے سرمایہ کاری گھوٹالہ میں ملزم نوہیرا شیخ اور ہیرا گروپ آف کمپنیز کی 23 غیر منقولہ جائیدادوں کو نیلام کیا ہے۔ ان جائیدادوں کی قیمت تقریباً 159 کروڑ روپے ہے۔

ای ڈی نے کہا کہ ایجنسی کے حیدرآباد زونل دفتر نے 19 جون کو میٹل سکریپ ٹریڈ کارپوریشن لمیٹڈ (ایم ایس ٹی سی) کے ذریعہ سپریم کورٹ کی ہدایت کے تحت نیلامی کی تھی۔ اس سے قبل ایجنسی نے نوہیرا شیخ اور ہیرا گروپ کے خلاف منی لانڈرنگ کی تحقیقات شروع کی تھیں۔ یہ الزام ہے کہ انہوں نے زیادہ منافع کا وعدہ کرکے عوام سے 5,978 کروڑ سے زیادہ کی سرمایہ کاری کی، لیکن وہ اصل رقم بھی واپس کرنے میں ناکام ر ہیں، ملک بھر کے سرمایہ کاروں کو دھوکہ دیا گیا ۔

ای ڈی نے کہا کہ نیلامی سے حاصل ہونے والی رقم کا استعمال سپریم کورٹ کی نگرانی میں اصل متاثرین کو معاوضہ ادا کرنے کے لیے کیا جائے گا۔

ایجنسی نے کہا کہ نوہیرا شیخ نے تحقیقات کے دوران سپریم کورٹ کی ہدایات کی تعمیل نہیں کی جس کی وجہ سے عدالت نے ان کی ضمانت منسوخ کردی۔ اس کے بعد حیدرآباد کی خصوصی پی ایم ایل اے عدالت نے 7 مئی کو ان کے خلاف غیر ضمانتی وارنٹ جاری کیا۔ 21 مئی کو ای ڈی نے انہیں گروگرام سے گرفتار کیا اور عدالت میں پیش کیا، جہاں سے انہیں عدالتی تحویل میں بھیج دیا گیا۔

نازنین انصاری، عرف عابدہ، جو کہ نوہیرہ شیخ کی پرسنل اسسٹنٹ تھی، بھی جرائم کی آمدنی سے منسلک جائیدادوں کے قبضے اور استعمال میں ملوث پائی گئی۔ سپریم کورٹ کے احکامات سے واقف ہونے کے باوجود، انہوںنے نیلامی کے عمل میں رکاوٹ ڈالی اور جائیدادوں کو غیر متاثر ہونے کے طور پر پیش کرنے کی کوشش کی۔ اسے بھی گرفتار کر کے خصوصیپی ایم ایل اے عدالت میں پیش کیا گیا، جہاں سے اسے عدالتی حراست میں بھیج دیا گیا۔

ہندوستھان سماچار

ہندوستان سماچار / عطاءاللہ