واشنگٹن، 19 جون (ہ س)۔فرانس کے دارلحکومت پیرس میں امریکی صدر اور ایرانی صدر کےدرمیان ہوئے14 نکاتی امن معاہدے پر دستخط کے بعد اگلے اقدامات پر تبادلہ خیال کے لئے نائب صدر جے ڈی وینس جمعرات کی رات سوئٹزرلینڈ کے لیے روانہ نہیں ہوئے ۔ وائٹ ہاؤس نے اس کی تصدیق کی ہے۔ تاہم دونوں صدور کے دستخط سے مشرق وسطیٰ میں کشیدگی میں نمایاں کمی آئی ہے اور ایران کے ساتھ جوہری پروگرام پر مذاکرات کا راستہ صاف ہو گیا ہے۔

سی بی ایس نیوز اور الجزیرہ کے مطابق وینس کا سفر ملتوی ہونے سے آبنائے ہرمز میں آئل ٹینکرز اور بحری جہازوں کی نقل و حرکت متاثر نہیں ہوئی ہے۔ دونوں صدور کی جانب سے معاہدے پر دستخط کے بعد آبنائے ہرمز کھل گیا ہے۔جہازوں کی آمد ورفت میں تیزی آ گئی ہے۔

وائٹ ہاؤس کے ترجمان نے صحافیوں کو بتایا کہ نائب صدر جے ڈی وینس جمعرات کو دیر گئے سوئٹزرلینڈ کے لیے ایران کے ساتھ مذاکرات شروع کرنے میں مدد کے لیے روانہ نہیں ہوئے۔ ترجمان نے کہاکہ وینس پہلے ہی ایک پریس کانفرنس میں کہہ چکے ہیں کہ تکنیکی بات چیت کے منصوبے کو ابھی حتمی شکل نہیں دی گئی۔ اطلاعات کے مطابق دونوں فریق تکنیکی بات چیت کا منصوبہ بنا رہے ہیں۔

دریں اثنا، ٹرمپ انتظامیہ نے ایران کے معاہدے کے بارے میں کانگریس کے رہنماؤں کو جانکاری دی ۔ وائٹ ہاؤس کے ترجمان نے کہا کہ ٹرمپ انتظامیہ کے سینئر حکام نے فون پر ایوان اور سینیٹ کے رہنماؤں کو معاہدے کے بارے میں آگاہ کیا۔ حکام نے سینیٹ کی خارجہ تعلقات کمیٹی اور ہاؤس فارن افیئرز کمیٹی کے اعلیٰ قانون سازوں کے ساتھ ساتھ سینیٹ کے اکثریتی پارٹی کے رہنما جان تھون اوراپوزیشن پارٹی کے رہنما چک شومر کو بھی فون کیا۔ سینئر حکام نے قانون سازوں کے سوالات کے جوابات بھی دیے اور امریکہ اور ایران کے درمیان آئندہ ہونے والے مذاکرات کا خاکہ پیش کیا۔

ادھر اسرائیل کے وزیر اعظم بنجامن نیتن یاہو نے ایران کے ساتھ امریکی معاہدے کے باوجود جنوبی لبنان میں اپنے سکیورٹی زون سے اسرائیلی افواج کے انخلاء کی سخت مخالفت کی ہے۔ حزب اللہ نے کہا ہے کہ اسرائیلی فوجیں لبنان کی سرزمین سے نکل جائیں۔ دریں اثنا، امریکی سینٹرل کمانڈ (سینٹ کوم) کا کہنا ہے کہ اس نے ایرانی بندرگاہوں پر عائد ناکہ بندی ہٹا دی ہے۔ تہران کا کہنا ہے کہ اس کی خلیج فارس آبنائے اتھارٹی کو آبنائے ہرمز سے گزرنے والے تجارتی جہازوں کو اجازت نامے جاری کرنے کی ذمہ داری سونپی گئی ہے۔

ہندوستھان سماچار

ہندوستان سماچار / محمد شہزاد