نائجر میں ایئرپورٹ پر دہشت گردانہ حملہ، 11 فوجی ہلاک، 22 دہشت گرد مارے گئے

نیامی، 19 جون (ہ س)۔ نائجر کے دارالحکومت نیامی میں ڈیوری ہمانی انٹرنیشنل ایئرپورٹ پر جمعرات کی علی الصبح دہشت گردانہ حملہ ہوا ہے۔ ایئرپورٹ پر ایک گھنٹے سے زیادہ وقت تک دھماکے اور فائرنگ ہوتی رہی۔ جمہوریہ ننائجر کی فوجی حکومت کی ابتدائی رپورٹ میں بتایا گیا کہ حملے میں 11 فوجی اور 22 دہشت گرد مارے گئے۔ انگریزی زبان کے اخبار ’’پریمیئر ٹائمز‘‘ نائجیریا کی رپورٹ کے مطابق، اس حملے میں دو عام شہری بھی ہلاک ہو گئے۔ بتایا جا رہا ہے کہ یہ فائرنگ ایئرپورٹ کے مرکزی داخلے کے پاس شروع ہوئی۔ اس کے بعد سیکورٹی فورسز نے پورے احاطے کو گھیر لیا۔

مقامی لوگوں نے بتایا کہ فوج کی گھیرا بندی کے بعد دہشت گرد ادھر ادھر بھاگنے لگے۔ نائجر کی فوج نے دہشت گردوں کا پیچھا کیا۔ فرار ہوتے وقت دہشت گرد ہتھیاروں کا ذخیرہ وہیں چھوڑ گئے تھے۔ ابھی تک کسی بھی گروپ نے ایئرپورٹ پر ہوئے اس حملے کی ذمہ داری نہیں لی ہے، لیکن اسی سال جنوری میں اسی ایئرپورٹ پر ایسا ہی ایک واقعہ پیش آ چکا ہے۔

اسلامک اسٹیٹ ان دی ساحل سے منسلک مسلح دہشت گردوں نے مارٹر اور ڈرون کا استعمال کرتے ہوئے کئی اطراف سے حملہ کیا تھا۔ انہوں نے سویلین ٹرمینل اور اس سے متصل ایئر بیس 101، دونوں کو نشانہ بنایا تھا۔ یہ ایئر بیس ملک کی فوجی کارروائیوں کے لیے ایک اہم اسٹریٹجک مرکز ہے۔ جنوری کے حملے میں نائجر کی فوج کے ساتھ روسی افریقہ کور کے جنگجو بھی تھے۔ انہوں نے کئی دہشت گردوں کو ہلاک کرتے ہوئے کچھ کو زندہ پکڑ لیا تھا۔ اس حملے میں رن وے، فوجی گاڑیوں اور کمرشل طیاروں کو بھی بھاری نقصان پہنچا۔

نائجر ایک دہائی سے زیادہ عرصے سے منظم اسلامی عسکری بغاوت کا سامنا کر رہا ہے۔ اپنے پڑوسی ممالک مالی اور برکینا فاسو کی طرح نائجر میں بھی فوجی حکومت ہے۔ اس فوجی حکومت نے وسیع علاقائی تشدد کو فیصلہ کن طور پر ختم کرنے کا وعدہ کرتے ہوئے اقتدار پر قبضہ کیا تھا۔ نائجر پرتشدد انتہا پسندی کے خلاف ایک پیچیدہ اور کئی محاذوں پر لڑی جا رہی لڑائی کے مرکز میں ہے۔ انتہا پسندی نے 2010 کی دہائی کے وسط سے ہی پورے ساحل خطے کو غیر مستحکم کر رکھا ہے۔

اس وقت نائجر کو مختلف قسم کے باغی گروپوں کا سامنا کرنا پڑ رہا ہے۔ مغرب میں (مالی اور برکینا فاسو کی سرحدوں کے پاس)، یہ آئی ایس-ساحل اور القاعدہ سے جڑے جے این آئی ایم سے لڑ رہا ہے۔ جنوب مشرق میں (لیک چاڈ کے پاس)، یہ بوکو حرام اور اسلامک اسٹیٹ ویسٹ افریقہ پروونس سے مقابلہ کر رہا ہے۔

ہندوستھان سماچار

--------------

ہندوستان سماچار / انظر حسن